Kuarta, 20 Outubru 2021 | Login
Diretór Nasional Jestaun Dezastre Naturais Sekretariadu Protesaun Sivil (SEPS), Agustinho Cosme Belo, hamutuk ho ekipa sira fahe ai-han bazika ba familia afetadu sira iha Suku Camea. Foto: Camilio/Independente. Diretór Nasional Jestaun Dezastre Naturais Sekretariadu Protesaun Sivil (SEPS), Agustinho Cosme Belo, hamutuk ho ekipa sira fahe ai-han bazika ba familia afetadu sira iha Suku Camea. Foto: Camilio/Independente.

Uma-Kain 706 Iha Suku Camea Hetan Ona Apoiu Úmanitaria Husi SEPS Featured

DILI:Diretór Nasional Jestaun Dezastre Naturais Sekretariadu Protesaun Sivil (SEPS), Agustinho Cosme Belo informa, SEPS apoiu úmanitaria ba familia uma-kain 706, ne’ebé afeitadu husi inudasaun.

Tuir dadus, familia afeitadu iha Suku Camea, Postu Administrativu Cristu Rei hamutuk 706.

“Iha semana rua liuba SEPS fahe ona ai-han bazika ba familia afeitadu hamutuk uma kain 401, nune’e ohin kontinua distribui tan ba restante sira hamutuk uma-kain 305. Apoiu ohin hanesan faze daruak hodi kompleta apoiu iha faze dahuluk nian” dehan nia ba jornalista sira iha Suku Camea, kuarta ohin (26/05).

Nia esplika, kada xefe familia sei simu Ai-han bazika hanesan fós saka 1, mina litru 2, ikan lata 10, kafe ho masin midar kilo 1.

Nia akresenta, apoiu hirak ne’e bele auguenta nesesidade moris ba loron balun nian.

Entretantu, Xefe Suku Camea Matos da Costa agradese ba Governu liu husi SEPS ne’ebé  oferese ona ai-han uituan ba komunidade sira.

Xefe Suku relata, komunidade iha Aldeia 6 ne’ebé ohin simu ai-han bazika mak hanesan, Aidak-Bihare, Ailele-Hun, Lenuk-Hun, Ailok-Laran, Bubur-Lau no Caisabe,

Enkuantu, Aldeia 7 ne’ebé antes ne’e simu ona mak hanesan, Aldeia Bee-Dosis, Fatuk Francisco, Lases, Namalai, Suku-Laran, Terminal no Aldea Camea.

Nune’e, tuir dadus populasaun iha Suku Camea hamutuk 2,500 ne’ebé fahe ba Aldeia 13.

 

Jornalista: Camilio de Sousa

Asistente Editor: Saturnina da Costa

Read 135 times Last modified on Kuarta, 26 Maiu 2021 21:56
Rate this item
(0 votes)