Nia dehan. antes ne’e iha suku refere Governu implementa uluk ona programa UKL faze dahuluk ka UKL regular, nune’e agora kontinua tan ho UKL+.

“Agora iha Postu Administrativu Balibo mak hetan UKL+A, tanba Primeiru Ministru Taur Matan Ruak nia vizita iha Batugade (Badut Mean) uma kondisaun aat, entaun Primeiru Ministru propoin mai iha Munisipiu katak, UKL +A tenke implementa hotu iha Badut Mean,”dehan nia iha Postu Administrativu Balibo Vila, sabado (15/10).

Nia hatutan, UKL+ ne’e iha kategoria rua, ida mak uma ne’ebé kalen aat ona depois truka deit kalen ho pregu no mós kategoria ida seluk mak halo konstrusaun foun ba uma sira ne’ebé kondisaun aat los ona.

Tan ne’e, Autoridade Munisipiu Bobonaro fó orientasaun ba Xefe Suku sira atu identifika didiak ema ne’ebé tama iha kategoria kbiit la’ek atu bele hetan UKL+ ne’e.

Nia haktuir, ba UKL regular daduk ne’e benifisiariu sira balun konklui ona no balun seidauk tanba kondisaun estrada ladiak, hodi difikulta ekipa sira distribui material konstrusaun ba fatin refere.

Nia dehan, ba benifisiariu sira ne’ebé nia uma finaliza ona mak sira ne'ebé hela iha estrada ninin maibé balun ne’ebé hela iha foho seidauk hotu.

Entretantu, molok ne’e, iha loron 29 Agustus 2022, Ministru Administrasaun Estatal, Miguel Pereira de Carvalho ho nia ekipa halo ona lansamentu ba fahe material ba konstrusaun no rehabilitasaun ba UKL+ ho Kategoria A iha Badut Mean.

Enkuantu, iha Orsamentu Jeral Estadu tinan fiskal 2022, Parlamentu Nasional deside hodi aumenta tan dolar amerkanu tokon U$71, ba programa UKL+, hodi konstrui uma ba benifisiariu hamutuk 4.000.