Apoiu nesesidade bazika sira hanesan, fós 20kg hamutuk saka 3.365, mina 500ML hamutuk kaixa 282 no mós ikan deho hamutuk kaixa 134.
Embaixador Uniaun Europeia mai Timor-Leste, Andrew Jacobs hatoo nia sentidu kondolensia no solidariedade ba familia ne'ebé afeitada husi pandemia Covi-19 no vitima ba inundasaun no Uniaun Europeia hamriik ho povu Timor-Leste durante tempu susar ida ne'e.
“Ami kontente ho suporta ne'ebé iha no mós iha forma ai-han no material ijene ba sira ne'ebé afeitadu husi dezastre foin lalais, ne'ebé aumenta liu tan difikuldade kauza husi Covid-19,”dehan nia iha nia diskursu, iha salaun MSSI, Kaikoli,(09/04).
Iha fatin hanesan, Country Director Plan International Timor-Leste, Dillyana Ximenes hatete, simbolikamente entrega ai-han no material ijene ba Ministeriu Solidariedade Sosial no Inkluzaun (MSSI) hodi suporta familia afeita husi pandemia Covid-19 no afeita husi inundasaun foin lalais iha Dili.
Durante iha periudo konfinamentu tanba moras Covid-19, familia barak mak hasoru difikuldade, inklui redusaun ba sira nia rendimentu no menus nesesidade baziku, espesialmente hahan.
Situasaun ida ne'e pior liu tan husi inundasaun, familia rihun ba rihun afeitadu tanba udan bo’ot iha loron 4 Abril 2021.
“Ema rihun ba rihun deslokadu, uma no infrastrutura hetan estragus no mout. Dezastre ne'e mos hamate ema barak no balun mos sei lakon. Feto, labarik, grupu vulneravel no ema ho difisiensia partikulamente risku durante emerjensia,”tenik nia
Husu mós autoridade sira, doador, organizasaun naun govermental no komunidade atu servisu hamutuk hodi ajuda familia, liliu ba sira ne'ebé iha sentru evakuasaun.
Entretantu Diretor Jeral MSSI, Rui Manuel Expostu hatete, sira servisu hamutuk ho Plan Internasional no Uniaun Europeia hodi responde ba situasaun ne’ebé afeita ba komunidade sira iha Munisipiu Dili, liuliu ba familia vulneravel sira.
Tuir dadus MSSI, apoiu sira ne'e sei benefisia ba uma kain rihun 5,755, konsentra liu ba feto, labarik feto, grupu vulneravel no mós ba ema ho defisiensia na’in 500.
Apoiu sira ne’e husi Plan Internasional ne’ebé finansia husi Uniaun Europeia hamutuk dolar amerika rihun $50.
Jornalista: Saturnina da Costa
Editor: Jose Sarito Amaral
