Durante julgamentu, Ministériu Públiku (MP) ne'ebé  Reprezentahusi Prokuradór Matias Soares husu bá tribunál atu halo alterasaun husi  médida  koasaun Aprezentasaun Periodika (AP) bá média koasaun Prizaun Preventiva.

MP argumenta katak arguidu sira la kumpre desizaun tribunál anterior no iha tentativa klaru atu halai sai husi territóriu, ne’ebé bele perturba investigasaun.

Durante tentativa halai, arguidu sira lori sasán barak, inklui:telemóvel 20, laptop 3, pasaporte 1, no speaker 1.

Situasaun ne’e, tuir prokuradór, sufisiente atu justifika medida rigorozu liu hanesan prizaun preventiva.

Maske nune’e, tribunál liu husi juiz estajiáriu Angelito Mendez Ribeiro rejeita pedidu Ministériu Públiku.

Tribunál konsidera katak krime dezobediénsia tuir artigu 224 no 244 Kódigu Penál la atinji moldura penál ne’ebé permite aplika prizaun preventiva.

Tanba ne’e, tribunál deside:la tau arguidu sira iha prizaun preventiva, aumenta aprezentasaun periódika husi semana ida dala rua ba dala tolu, no obriga arguidu sira aprezenta an direta iha tribunál, la’ós iha polísia hanesan antes.

Advogadu Privadu, Júlio Cardoso, defende desizaun tribunál hanesan medida justu tuir lei.

Nia esplika katak prizaun preventiva presiza krime ho moldura penál aas liu (liu husi tinan lima), enkuantu kazu ida ne’e mak dezobediénsia ho pena máxima tinan tolu.

“Kuandu tinan tolu ba kraik ne'e ema labele tama prizaun, tanba Juiz tetu buat hothotu tanba ne'e mak aplika de'it médida koasaun ba aprezentasaun periódika,” nia dehan.

Maibé nia mos fó alerta katak se iha tentativa halai tan iha futuru, tribunál bele muda desizaun no aplika prizaun preventiva.

“Se ba oin mak arguidu sira tenta atu halai sai tan husi territóriu Timor-Leste, prosesu tuir mai tenke ba Prizaun Preventiva,” dehan defeza ne’e.