×

Atenção

JUser: :_load: Não foi possível carregar usuário com ID: 430

Timoroan Planeia Halo Asaun Pasífiku Hasoru Embaixada Portugál Featured

By Artur da Luz Marsu 01, 2018 1827
Timoroan antrian trata dokumentus iha embaxada Portugal iha Dili Timoroan antrian trata dokumentus iha embaxada Portugal iha Dili

DILI: Timoroan sira ne’ebé durante trata dokumentu hodi sai sidadaun Portugál hasoru dezafiu boot. Ne’e duni, planeia hodi halo asaun pasifika hodi hasoru Embaixada Portugál iha Timor-Leste.

Dokumentu timoroan sira-na'in barak mak pendente hela iha embaixada Portugál durante tinan barak nia laran. Ne’e duni, liu husi asaun pasifika ne’e hakarak atu husu klarifikasaun.

Laurentino Tavares, portavós ba atividade ne’e hateten, dokumentu timoroan sira daudaun kontinua butuk hela iha embaixada laran. Ne’e duni hakarak ezije ba Embaixada Portugál aselera prosesu hirak ne’e.

“Dokumentu ne’e balun embaixada pendente hahú 2015 to’o oras ne’e seidauk hetan sertidaun narrativa”, tenik nia, iha Embaixada Portugál, Dili, horisehik.

Nia dehan, asaun ne’ebé sei akontese iha tempu badak nia laran, hakarak husu boa vontade husi funsionáriu embaixada Portugál nian atu prosesa lalais dokumentu hirak ne’ebé pendente hela.

Laurentino dehan, durante sira gasta tempu, enerjia no lakon osan barak tanba de'it atu hetan billete identidade no mós pasaporte Portugál nian hodi buka servisu iha rai li'ur.

Nia esplika, prosesu trata dokumentu ne’e hahú iha 2015 to’o ohin loron, maibé seidauk hetan sertidaun narrativa. Tanba antes ne’e, parte embaixada nian promete sei hetan sertidaun narrativa iha fulan neen nia-laran.

Iha fatin hanesan, Reinaldo Pereira hateten, to’o oras ne’e foin-sa’e besik rihun tolu mak sai vítima, tanba funsionáriu sira iha embaixada la servisu ho boa fé bainhira trata dokumentu timoroan sira nian.

Nia esplika, bainhira dokumentu hirak ne’e pendente parte funsionáriu embaixada Portugál nian la halo klarifikasaun. Ne’e duni, ejize hodi bele fó esplikasaun tanba trata dokumentu hodi hetan narrativa sempre selu osan ho montante $120.

Tanba ne’e, timoroan sira ne’ebé trata dokumentu sei koordena malu atu halo asaun pasifika hasoru Embaixada Portugál. Nune'e, ezije ba Estadu Timor-Leste tenke rezolve burokrasia ne’ebé mosu iha embaixada Portugál.

Observasaun diáriu ne’e iha terrenu, timoroan lubuk ida mak hamriik no hakilar iha embaixada oin hodi ezije diretu, maibé PNTL ba halo atuasaun tanba mosu engarafementu iha embaixada Portugál oin.

To’o notísia ne’e hatún, diáriu ne’e seidauk konsege halo konfirmasaun ba parte Embaixada Portugál nian. 

Rate this item
(0 votes)

Independente Digital TV