Timor Oan Na’in Rua Konfirmadu Positivu Covid-19 Featured

By Husi: Ekipa Independente Fevereiru 03, 2021 1060
Koordenador Pilar VII. Dr.Nilton do Carmo, anunsia atualizasaun  numeru Covid019.ba loron ohin, kuarta (3/2) foto: Independente Koordenador Pilar VII. Dr.Nilton do Carmo, anunsia atualizasaun numeru Covid019.ba loron ohin, kuarta (3/2) foto: Independente

DILI: Ministeriu Saude (MS) liu husi ekipa koordenasaun  pilar VII, rezista tan sidadaun Timor- oan na’in rua konfirmadu positivu Covid-19. Sidadaun na’in rua ne’e kompostu husi mane no feto.

Tuir koordenador Pilar VII Dr.Nilton do Carmo hatete, ohin loron 3 fulan fevereiru 2021, Komisaun Nasional rezista tan kazu konfirmadu pozitivu Covid-19 ba Timor oan na’in rua, sidadaun na’in rua ne’e mane ho idade 22 no feto ho idade 34, sira na’in rua laiha simtoma.

“ Sidadaun Timor- oan na’in rua ne’e,  ami nia ekipa vizilansia lori ona ba iha fatin izolamentu Vera Cruz,” dehan nia liu husi Konferensia Imprensa ba Jornalista, (03/02)

Nia hatutan, Timor oan na’in ruan ne’e mai husi nasaun viziñu Indonézia husi provinsia ne’ebé la hanesan, iha loron 20 fulan Janeiru, sira tama mai iha Timor liu husi Pontu entrada Batugade hamutuk ho pasajeiru na’in 18.

Sidadadaun sira ne’e kumpri kuarantena obrigatoriu iha fatin ne’ebé lahanesan, ida  iha  Ótel Leokase no ida seluk iha Ótel Time Square.

“ Ita nia ekipa vizilansia epidemolojika ba halo teste swab dahuluk iha loron 21 janeiru ho rezultadu teste negative, teste daruak foti iha loron 1 fulan fevereiru no iha loron 2 fevereiru rezultadu RT-PCR hatudu pozitivu SARS CoV-2,”

Enkuantu tuir dadus, kazu foun aumenta na’in 2 kazu kumulativu iha 77 no atuan baixa sa’e ba 24, iha Dili 23 no RAEOA na’in 1.  

Rate this item
(0 votes)
Last modified on Kuarta, 03 Fevereiru 2021 14:53

Independente Digital TV