Timor-oan iha Kuerentina Hotel Katuas Hakarak-Sai Featured

By Jonio da Costa Abril 15, 2020 2369
Ambulansia iha Hotel Katuas. Foto Jonio da Costa/INDEPENDENTE Ambulansia iha Hotel Katuas. Foto Jonio da Costa/INDEPENDENTE

DILI:Maski seidauk kompleta loron 14 iha kuerentina tuir regras saúde mundiál nian, maibé timor-oan sira ne’ebé hela iha kuerentina ezijé hakarak sai husi fatin ne’e.

Pessoal Saúde ne'ebe lakohi publika nia identidade iha Kuerentina Hotel Katuas informa katak, timor-oan sira iha kuerentina ezijé hakarak sai husi fatin ne’e. Sira konsidera Hotel Katuas kontaminadu ho coronavirus (COVID-19, hafoin sira nia kolega na’in lima positivu COVID-19.

“Sidadaun sira ne'ebé kuerentina iha Hotel Katuas sei la koopera ho pesoal saúde ne'ebé halo atendimentu iha Hotel ne’e. Sira hakarak sai husi hotel ne’e ba fatin seluk,”dehan Pessoál Saúde id aba jornalista INDEPENDENTE Online, kuarta, iha Hotel Katuas.

Pessoál Saúde ne’e hatete, timor-oan sira iha kuerentina lakohi koopera no impede ambulansia halo evakuasaun timor-oan balun ne’ebé sintoma COVID-19 ba fatin izolaameentu.

“Tuir lolos ohin loron 15 Abril, iha oras tuku 11 Otl atu evakua tan sidadaun na’in rua husi Hotel Katuas maibé nia kolega sira mak lakohi fó atu ambulansia bele lori ba fatin Izolamentu iha Vera Cruz,”nia informa.

Aliende ne’e, timor-oan sira ne’e mós ameasa la koopera ho parte saúde atu hasai sira nia ran hodi ba halo teste iha laboratorium, bainhira ekipa Pandemia Covid-19 la muda ses sira husi Hotel Katuas.

“Ami tama ba atu hasai sira nia ran hodi ba teste no atu evakua sai mos ema na’in rua ba Vera Cruz maibé sidadaun sira hatan ba ami katak sei la koopera hodi fó ami nia isin atu imi hasai ran hodi ba halo taste se bainhira ami la muda sai husi fatin ne,”haktuir Pessoál Saudé ne’e.

Rate this item
(0 votes)

Independente Digital TV