Ministra Saúde, Elia dos Reis Amaral hatete, iha tinan 2026 MS simu orsamentu fiskal hamutuk millaun $69 no husi orsamentu ne’e MS hetan redusaun kompara ho OJE ba MS iha tinan 2025.
“Agora ba parte ministeriu saúde nian, orsamentu ezekuta ba tinan 2025 ita ezekuta ona 48%. Entaun ita simu orsamentu fiskal ba tinan 2026 hamutuk millaun $69, signifika ita hetan redusaun ba iha millaun rua. Sé ita hetan redusaun ba alokasaun orsamentu, signifika ita hetan dezafius makaas liu tan, nune’e oinsa ita bele halo melloramentu persensaun,” dehan Ministra Ba Jornalista sira iha salaun MF Aitarak-Laran, Kuarta (07/08).
Ministra hatutan, husi montante orsamentu ne’e MS mós prevee orsamentu ba adisional total hamutuk millaun $37 ba iha kategori sira hanesan bens servisu, salariu vensimentu, kapital menor, kapital dezenvolvimentu. Ne’e mak hola parte iha kategoria orsamentu tinan 2026.
Enkuantu, programa prioridade ba tinan 2026, Ministra Elia hatete, Ministeriu Saúde nia Programa ba iha tinan 2026 iha haat hanesan fortalesimentu dezenvolvimentu instituisional, kuidadus saúde primaria, kuidadus saúde sekundaria no terseira.
Ministra dehan, iha salariu vensimentu husu adisional tanba MS atu valorize profisional saúde sira ne’ebé mak iha tinan barak nia laran sira seidauk iha oportunidade atu hasa’e progresaun kareira nian ba sira nia-aan rasik.
“Entaun hanoin katak progresaun ka enkuadramentu ba progresaun ne’e rasik ita hahú husi tinan ida ne’e, ita hahú ho persentajem ne’ebé ita akumula hamutuk rihun tolu resin ba iha enkuadramentu rejime espesial ba profisional saúde hotu,” Ministra Esplika.
Nia akresenta, Sira neebé mak servisu tinan naruk ona iha Ministeriu Saude sira sei hetan progresaun ka enkuadramentu progresaun hotu-hotu neebé servisu hamutuk ho parte Komisun Funsaun Publika nian.Tuir mai progresaun sei kontinua ba tinan 2026, ho ida ne’e mak husu adisional.
Enkuatu, Ezekusaun OJE 2025 nia MS ezekuta ona pusentu 48, husi orsamentu montante $73.931.148, ne’ebé fahe ba kategoria salariu vensimentu $37.117.970, bens servisu $13.414.442, tranferensia públika $20.990.400, kapital menór $1.000.00 no kapital dezenvolvimentu $1.140.336.
