Iha ninia intervensaun, Taur Matan Ruak hateten, desizaun Prezidente Repúblika nian hodi nomeia juis Deolindo dos Santos ba Prezidente Tribunál Rekursu ne’e hanesan onra boot ida.

“Ha'u atu observa katak nomeasaun ba reprezentante aas liu podér judisiál Timor nian nu’udar ezemplu di'ak ida husi instituisaun demokrátika sira nia lala'ok regulár,” dehan nia, iha Palasiu Prezidensiál, Ai-Tarak Laran, Sesta (28/4).

Nia dehan, Prezidente Tribunál Rekursu nia substituisaun iha kondisaun estabilidade nia laran, ne'ebé hatudu relasaun institusionál nia maturidade demokrátika, liu tiha tinan 15 dezde restaurasaun independénsia.

Tanba ne’e, Taur realsa, podér judisiál ne'ebé forte, independente ho kapasidade, hanesan kondisaun esensiál atu harii Estadu Direitu Demokrátiku tuir Konstituisaun RDTL haruka no ne'ebé luta ba durante tinan barak nia laran.

“Ita nia vizaun kona-ba Estadu independente ida, ne'ebé sai mata-dalan ba ita nia luta ba libertasaun nasionál no ema barak lakon sira nia vida ba, hanesan mós vizaun ida kona-ba Estadu ida ne'ebé justu no ne'ebé respeita sidadaun sira nia direitu sira iha kondisaun igualdade”, tenik nia.

Tanba realizasaun ba mehi hirak ne'e mak ohin selebra ho nomeasaun ba Prezidente Tribunál Rekursu foun.

Iha oportunidade ne'e, Xefe Estadu hato'o agradesimentu ba juis Guilhermino da Silva (PTR sesante) ne'ebé remata nia knaar nu'udar Prezidente Tribunál Rekursu.

Tanba Mandatu ne'ebé remata hanesan ezemplu ida kona-ba izensaun, dignidade no aten brani hodi defende Tribunál sira nia independénsia, juis sira nia kondisaun profisionál no Tribunál sira nia kualidade.

“Ha'u hein katak ninia ezemplu sei fó forsa ba joven majistradu sira Nasaun nian” dehan Taur.

Nia fiar katak, Prezidente Tribunál Rekursu foun sei bele hataan ba dezafiu sira ne'ebé Tribunál Rekursu sei enfrenta hela, liuliu sira ne'ebé urjente liu.

Iha tempu hanesan, PR Taur mós halo intervensaun bainhira toma de pose ba Prokuradór Jerál Repúblika (PJR), José da Costa Ximenes.

Nia dehan, afirmasaun Estadu Direitu Demokrátiku nian ne'ebé sai fali objetivu nasionál hafoin restaurasaun independénsia.

Ho objetivu hirak ne'e, Xefe Estadu dehan Konstituisaun hahú hodi temi kona-ba prinsípiu Estadu Direitu no soberania populár nian, no Ministériu Públiku rasik hanesan pilar importante liu ida iha prosesu harii Estadu ne'ebé justu, hakru'uk ba lei ho direitu.

Hafoin liu tinan 15, Ministériu Públiku nia asaun bele sukat bazeia ba knaar ne'ebé nia hala'o iha komunidade nia moris, tuir Konstituisaun haruka, ho kompeténsia atu kaer metin legalidade demokrátika no promove banati tuir lei, reprezenta Estadu, hala'o asaun penál no defende labarik sira, ema ne'ebé laiha no inkapasitadu sira.

Nia dehan, luta hasoru korrupsaun kontinua sai nu’udar preokupasaun ema hotu nian atu bele promove distribuisaun ida ne'ebé di'ak liu ba rikusoin nasionál entre sidadaun sira, hodi tau matan ba ema kbiit laek sira.

Tanba ne’e, Matan Ruak akresenta serbisu hirak ne'e ezije atu timoroan hotu kolaborasaun ho Ministériu Públiku hodi kria kultura sivizmu ida no halo denunsia ba tentativa korrupsaun ne'ebé de'it akontese iha rai doben ida ne’e.

Nia reafirma katak, Prokuradór Jerál Repúblika hala'o ninia kompeténsia konstitusionál no legal sira ho izensaun, imparsialidade no lideransa hakmatek ida iha Ministeriu Públiku.

Nune’e, Taur hato’o mós votu susesu ba Prokuradór Jerál Repúblika nia mandatu foun ne'e sei sai susesu ba povu no nasaun nian.