“Fumigasaun paradu, tanba Aimoruk rega susuk hotu, nunee fumigasaun paradu durante semana ida nia laran, hahú iha loron 8 fevereiru too testa ohin (15/02),”dehan nia ba jornalista sira iha salaun MSSI, Kaikoli, tersa nee (15/02).

Nia hatutan, ekipamentu ba fumigasaun nee hamutuk 12 neebé durante nee uza ba iha aldeia sira neebé sai risku ba dengue.

Nia esplika, ba area fumigasaun nian kuaze postu haat iha Kapital Dili kobre hotu ona, maske iha aldeia balun seidauk, maibé ekipa sira kontinua halo esforsu hodi halo fumigasaun.

Nia akresenta, total uma komunidade neebé halo ona fumigasaun hamutuk rihun 19, husi total uma kain iha rihun 50 iha Kapital Dili.

Nia hatutan, maske fumigasaun paradu, maibé atividade sira seluk neebé apoiu ekipa saúde Munisipiu Dili nian lao hamutuk ho Crus Vermelha Timor-Leste (CVTL) no ispetotor sanitaria sira, kontinua fahe aimoruk abate no mós halo sosializasaun ba fatin sira neebé sai hanesan risku ba dengue.

Tanba nee, tuir nia, aimoruk abate nee sufisiente hodi bele halo estimulasaun durante fulan tolu nia laran, hahú iha janeiru too abril, hafoin liu fulan tolu mak bele distribui tan. Tanba durasaun ba aimoruk nee too fulan tolu.

Entretantu, tuir dadus husi Ministeriu Saúde liu husi Diresaun Departamentu Vijilansia Epidemolojia relata, too loron 14 fevereiru 2022 total kazu dengue iha teritoriu laran tomak hamutuk 2.045. Husi némeru nee, na’in 30 mak lakon vida.

Asistente Editor: Saturnina da Costa