Sekretáriu Jerál Parlamentu Nasionál, Edgar Sequeira Martins informa, prosesu akizasaun ba viaturas la’o hela iha Komisaun Nasionál Aprovizionamentu (KNA) no tenderizasaun iha ona rota final katak kuaze konklui ona.

"Ita espera iha fulan ida ne'e bele konklui, fulan oin mai, Setembru, bele asina kontratu par depois see mak manán projetu ne'e bele halo serbisu hodi hatama karreta mai Parlamentu Nasionál ba deputadu sira," informa Edgar, bainhira aprezenta orsamentu Parlamentu Nasionál nia ba tinan 2026, iha edifisiu Ministériu Finansas, Aitarak Laran, Sesta (22/08).

Tuir tarjetu, nia dehan, molok tinan 2025 remata karreta sira ne'e to'o ona iha Timor-Leste nune’e bele fasilita deputadu sira atu hala'o serbisu ho di'ak.

“Unidade viatura sira ne'e tuir númeru deputadu 65 ne'ebé mak iha Parlamentu. Ita hein CNA konklui ninia prosesu aprovizionamentu, see mak menan? mai husi nasaun ne'ebé? ne'e Parlamentu hatene simu karreta tuir espesifikasaun ne'ebé mak iha," nia dehan.

Orsamentu ba akizasaun karreta ne'e, nia informa tokon $4.2 resin, maibé depende ba prosesu aprovizionamentu.

“Kompaña ne'ebé mak manan ne'e nia manan ho orsamentu hira pur carro ne'e depende prosesu aprovizionamentu mak hatene. Klaru ke sei la gastu hotu orsamentu $4.2 milioens ne'e tanba kompañia barak mak sei konkore, orsida balun sei aprezenta presu ne'ebé mak ki'ik liu no mós juri sira iha CNA haree ida ne'ebé mak di'ak liu,” dehan nia.

Sekjer ne’e afirma, nia parte sei halo esforsu atu tinan ne’e nia rohan karreta tenke mai tanba alokasaun orsamentu ba karreta ne’e iha OJE 2025.

"Prosesu aprovizionamentu la'o, karreta sira ne'e mai ita sei haree marka saida," katak nia.

Iha biban ne’e, Edgar informa mós kona-ba ezekusaun PN nian ba OJE 2025.

Sekjer ne’e informa, daudauk ne’e PN konsege ezekuta ona 66% husi total OJE tokon $23 resin ne’ebé aloka.

"Parlamentu Nasionál ninia ezekusaun ami atinje ona 66%, ne'ebé kompostu husi ezekusaun atual, komprimisiu no mós obrigasaun," dehan nia.