SIJK Rejista Tan Ema Na’in 2 Mate ho Covid-19

By Saturnina da Costa Setembru 05, 2021 341
Ema mate. Foto:Dok/Independente. Ema mate. Foto:Dok/Independente.

DILI: Sala Situasaun Sentru Integradu Jestaun Krize (SIJK) relata, ohin (05/09) ekipa konjunta saúde rejista tan sidadaun Timor-Oan na’in rua mate ho Covid-19 iha Sala Izolamentu Lahane no Sentru Saúde Riamare-Baucau.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, matebian na’in rua ne’e kompostu husi bebe na’in ida ho ema bo’ot ida.

Rui esplika, bebe mane ho idade fulan 10, hanesan sidadaun Timor-Oan. Bebe  ne’e hamutuk ho nia inan-aman hela iha Munisipiu Baucau.

“Iha loron 2 fulan-Setembru tinan 2021, diagnóstikadu iha Sentru Saúde Riamare Baucau, ho sindroma insufisiénsia respiratoria aguda (SIRA) tanba Covid-19. Enkuantu, matebian sofre mós desnutrisaun severa ho ensefalite. Nune’e, matebian hakotu iis iha sabado horseik (04/09) tuku 17:30 oras Timor-Leste,”dehan nia iha komunikadu ne’ebé Online INDEPENDENTE asesu, domingo ne’e.

Entretantu, iha mós mane ida ho idade 58 hanesan sidadaun Timor-Oan, hela iha Munisipiu Aileu. Matebian refere simu ona vasina kompletu.

Iha loron 27 fulan-Agosto tinan 2021 diagnóstikadu iha HNGV, ho sindroma insufisiénsia respiratoria aguda (SIRA) tanba Covid-19. Nune’e, iha loron ne’e kedas matebian hala’o tratamentu iha Sala Izolamentu Lahane.

Ho nune’e, ohin tuku 14:55 oras Timor-Leste, matebian hakotu-iis.

Enkuantu, familia husi matebian na’in rua ne’e, kordena ona ho ekipa saúde atu hala’o funeral tuir protokolu ne’ebé adopta iha Timor-Leste.

Tuir dadus husi SIJK, total ema ne’ebé mate ho Covid-19 hamutuk na’in 80.

Rate this item
(0 votes)

Independente Digital TV