Sidadaun Portugal Na’in 211 Fila Ona ho Aviaun EUROATLANTIC Featured

By Jonio da Costa Abril 04, 2020 3112
Sidadaun Portugal sae hela Aviaun EuroAtlantic, iha Aeroportu Internasional, Nikolau Lobato, Dili. Foto Jonio da Costa/INDEPENDENTE Sidadaun Portugal sae hela Aviaun EuroAtlantic, iha Aeroportu Internasional, Nikolau Lobato, Dili. Foto Jonio da Costa/INDEPENDENTE

DILI: Sidadaun Portugal ne’ebé durate ne’e hala’o servisu iha Timor-Leste, Sabdu ohin (4/4) fila ona ba sira nia rain liu husi Aeroportu Internasionál, Nikolau Lobato, Dili, relasiona ho ameasas surtu Covid-19.

Sidadaun Portugal hamutuk 211 mak deside fila ho Aviaun EuroAtlantic Boeing 767-300 ER husi Portugal. Sira deside fila tanba senti la seguru iha Timor-Leste husi covid-19 ne’e.

Surtu Covid-19 sai ona kauza Globál hodi paraliza total atividades úmana nian inklui Timor-Leste. Nunee obriga sidadaun Portugal ne’ebé durante ne’e balun servisu no balun mai nuudar turista iha Timor-Leste tenke fila hotu.

Prezidente Autoridade Navegasaun Aeró Timor-Leste (ANATL), Romaldo A. S. da Silva hatete, ohin aviaun ho marka EuroAtlántic Boeing 767-300 ER to’o iha Aeroportu Internasionál Nicolau Lobato Komoro Dili, iha oras tuku 7:00 dader hodi tula sidadaun Portugal fila ba sira nia rain.

Nia dehan, total sidadaaun Portugal hamutuk 211 ne’ebé fila, kompostu husi ema boot 198, labarik kiik na’in 12 no bebé na’in ida (1). Enkuantu todan bagazen ho total kuaze tonelada haat (4).

Ho nunee, pasajeirus no bagazen hamutuk iha aviaun nee’e ho total tonelada 19. 458.

Aviaun Euro Antlántic Boeing 767-300 ER ne’e hanesan request Flight atu mai tula de’it passajeirus husi sidadaun Portugal.

“Ne’e la taka dalan ba aviaun sira seluk ne’ebé hanesan hau dehan katak konaba emerjénsia nian hanesan karik aban bairua ita nia Governu atu aluga aviaun ruma atu tula sasan médikamentu mai Timor-Leste ka tula ita nia sidadaun sira ne’ebé oras ne’e iha hela estranjeiru sira ne’e operasionál ANATL mantein loke ita nia Aeroportu ba sira atu mai,”dehan nia.

Rate this item
(0 votes)
Last modified on Sábadu, 04 Abril 2020 13:14

Independente Digital TV