Tuir Sekretáriu Estadu Komunikasaun Sosial, Expeditu Loro Dias Ximenes hatete, SEKomS hamutuk ho KI hala’o enkontru pre-liminariu hodi deskute kona ba revizaun lei komunikasaun sosial, no iha diskusaun ne’e parte rua konkorda hodi haklean liu tan revizaun ne’e iha ninia estrutura rezislasaun nian.
Nune’e, iha semana oin, sira sei halo fali diskusaun ida hodi deskute kona ba artigu sira ne’ebé mak atu halo revizaun.
“Ohin iha diskusaun dahuluk ami konkorda malu katak presiza atu haklean liu tan revizaun ne’e iha nia estrutura rezislasaun nian no ami konkorda katak iha semana oin, iha dia 14 mai mak ami sei diskute artigu por artigu sira ne’ebé mak atu halo revizaun, ne’ebé ohin ami halo diskusaun pre-liminariu dei’t hanesan bolu dehan katak preamblu de’it no ami seidauk tama iha nia substansia revizaun nian, semana oin mak ami diskute substansia revizaun lei komunikasaun sosial,”dehan nia ba Jornalista sira iha Sala DNDM-SEKomS, Palasiu Governu,Dili (06/08/25).
Governante ne’e dehan, importante mak SEKomS ho Konsellu Imprensa konkorda atu halo revizaun ba lei komunikasaun sosial, tanba lei komunikasaun sosial ne’e produs iha tinan 2014 iha mandatu VI Governu no implementasaun lei ne’e to’o ona tinan 11.
Nune’e ho avansu teknolojia ne’ebé iha, presiza halo fila fali revizaun ba lei refere.
“Implementasaun ba lei ne’e uluk ita nia distintus deputadus sira iha lejislatura iha VI governu halo iha 2014 no tinan 11 ona, ho avansu teknolojia ho preokupasaun husi públiku konaba komunikasaun sosial nia papel iha prosesu desenvolvimentu, prosesu konstrusaun estadu ho nasaun, entaun presiza duni atu revee, tanba ne’e mak ami to’o ona pontu konkorda malu katak presiza duni ona atu halo revizaun, no ohin ami ko’alia prinsipiu jerais oinsá mak atu bele halo revizaun ne’e, no ami sei kontinua iha semana oin atu ko’alia konaba substansia,” tenik nian.
Iha fatin hanesan Prezidente Konsellu Imprensa Timor-Leste António Maria da Costa Mali hatete, diskusaun ne’e importante tebes atu bele atinji objetivu ida hanesan no ba interese ema hotu nian, hodi asegura jornalismu iha nasaun.
“Buat ida ita hakarak atinji objetivi ida ke hanesan ba interese ita hotu hotu nian hodi asegura jornalismu iha ita nia rai, pronto, ita iha diskusaun hanesan ne’e la’os dala ida de’it, maibé sei kontinua to’o iha objetivu ida, entaun ami ohin foka ba pontus balun ne’ebé presiza halo tan ajustamentu para inkontru tuir mai ami bele intende malu di’ak liu tan, tanba ne’e mak ohin ami ho sekretariadu estadu propoin atu kontinua fali ba dia 14. Ami sei mai hasoru malu fali iha ne’e, diskusaun ne’e sei tama iha nivel foun ida ne’ebé ami sei ko’alia konaba substansia ba alterasaun lei nian,”dehan Prezidente Konsellu Imprensa.
Nia haktuir, lei ne’e importante tebes, nune’e labele halo urjenti, tanba lei ne’e atu regula ema hotu, nune’e tenke kuidadu, tanba ne’e iha semana oin sei halo diskusaun ba iha substansia nian.
