Diretór Jerál Formasaun Profisionál no Empregu, Carlito Rasário Cabral hatete, ba traballadór sira ne’ebé ba servisu iha rai-liur sei aplika regra ida hodi hapara lai traballadór timoroan ne’ebé re-entry bebeik atu nune’e sira bele maneja osan ne’ebé sira hetan ona.

“Ita boot sira ba presta servisu hodi hetan osan no esperiénsia, ita boot sira ba sai traballadór maibé fila mai dezempregu nafatin liliu ba sira ne’ebé re-entry,” dehan Diretór Jerál liu husi ninia diskursu iha Salaun SEFOPE Kaikoli, Kinta (29/02).

Diretór esplika, traballadór labele abitua bebeik ho re-entry ne’e hodi gasta osan ne’ebé sira hetan ona, maibé hanoin ba katak to’o tempu ida re-entry ne’e sei para hodi fó tempu ba ema seluk.

“Tanba ne’e aban bainrua ita sei kria regra balun atu nune’e ida ne’ebé ba mai ne’e tenki deskansa oituan hodi fó tempu ba sira seluk ba, tanba ne’e mak ita boot sira hanoin ona katak depois de para halo ona buat ruma ka lae,” Dirétor esplika.

Nune’e, SEFOPE husu ba traballadór sira labele orgullu de’it ho traballadór maibé tenki aprende ema nia esperensia atu nune’e bainhira fila mai bele aplika fali iha Timor ho fundus ne’ebé traballadór sira iha.

Tanba governu liu husi SEFOPE hamutuk ho DFAT iha ona departamentu re-integrasaun tan ne’e sei kria programa ida atu tau matan ba traballadór sira ne’ebé kontratu remata ona, hodi apoiu fali traballadór sira ne’ebé mak hakarak halo negósiu hodi responde ba nesesidade.

Enkuantu, antes ne’e, Diretór Jeral Corporativus, Nelson Carvalho mós husu traballadór sira ne’ebé re-entry beibeik husu atu labele sai traballadór bebeik maibé tenki sai mos empregadór.

“Balun ne’ebé ba ona dala rua ou tolu peluenus fila mai sai ona empregadór, ha’u fiar traballador sira ne’ebé saving di’ak, la gasta arbiru nia tempu ida sai ona empregadór la sai ona trabllador, tanba halo manejementu ne’ebé di’ak tempu ida sei sai empregadór,” dehan dehan Diretór Jeral Korporativus.