Nia dehan, revista trimestrál ne’e, hakarak atu sai nu’udar espasu ida ba informasaun no reflesaun kona-ba papél Ministériu Públiku nian iha administrasaun justisa.
Iha revista ne'e, sei ko’alia kona-ba inisiativa sira Prokuradór Jerál Repúblika nian, adjuntu sira Prokuradór-Jerál Repúblika nian no servisu sentrál tolu PJR nian, hanesan kontensiozu estadu no interese koletivu no difuzu, gabinete kooperasaun judisiária, direitu komparadu no relasaun internasionál sira, no gabinete kombate hasoru korrupsaun no kriminalidade organizadu no kontribuisaun esensiál servisu sira apoiu tékniku no administrativu nian.
"Nune’e atu fó hatene kona-ba atividade Prokuradoria Repúblika primeira instánsia sira nian, ne’ebé garante prezensa Ministériu Públiku nian loroloron hamutuk ho sidadaun no iha munisípiu sira, hodi garante katak justisa hala’o iha territóriu nasionál tomak," dehan Nelson, iha edifisiu MP, Kolmera, Sesta (12/6).
Nia hatutan, revista ne’e la’ós fó sai de’it faktu sira maibé nia kumpre misaun pedagójika no sívika ida atu esplika atribuisaun no kompeténsia hosi órgaun no servisu sira Ministériu Públiku nian, ne’ebé instala ona, hodi fasilita asesu ba lei no justisa, no reforsa konxiénsia katak ne’e mak direitu fundamentál sidadaun sira nian.
"Halo ida ne’e hodi konsolida konfiansa públiku nian iha instituisaun no hodi afirma katak Ministériu Públiku nu’udar guardiaun ba legalidade demokrátika no defende valór fundamentál sira komunidade nian," esplika PJR.
Nia adianta, bainhira Supremu Tribunál Justisa no Tribunál Rekursu ofisialmente estabelese ona sei estabelese mós Prokuradoria Repúblika Rekursu nian no medida sira kona-ba ida-ne’e Prokuradoria Jerál Repúblika foti daudaun hela, no hein katak, iha edisaun sira revista ida ne’e nian tuirmai, bele fó sai mós atividade sira Prokuradoria Repúblika Rekursu nian , hodi hariku liutan konteúdu publikasaun ida ne’e nian.
Revista Ministériu Públiku nian la’ós de’it nu’udar instrumentu komunikasaun institusionál ida. Maibé nu’udar veíkulu sidadania nian, hodi hakbesik justisa ba sidadaun sira no projeta, ho klareza no rigór, knaar ne’ebé Ministériu Públiku hala’o iha konstrusaun Estadu Direitu.
"Ha’u hein katak publikasaun ne’e atije duni ninia objetivu ne’ebé hakarak, promove koñesimentu, transparénsia no partisipasaun sívika, hodi hametin konfiansa sidadaun sira nian iha Ministériu Públiku, iha justisa no iha instituisaun sira seluk ne’ebé intervein iha prosesu administrasaun justisa," tenik Nelson.
Adjuntu Provedoria Direitu Umanu no Justisa (PDHJ), Rigoberto Monteiro informa, lansamentu ba revista MP ne'e parte ida husi promosaun governasaun di'ak ida, ne'e instituisaun iha responsabilidade atu halo akuntabilidade ba iha nia povu.
"Ida-ne'e ne'e signifika ita relata sa'ida de'it mak ita halo ba povu hatene. Espera katak revista ne'e bele ajuda ita-nia komunidade liu-liu oinsá espasu sira ne'ebé importante ba ita-nia sosiedade atu asesu ba justisa", nia dehan.
Adjuntu PDHJ hatutan, importante liu mak kria mekanizmu ne'ebé mak adekuadu i asesivel ba sosiedade atu asesu ba justisa, ida-ne'e mais importante tanba husi relatóriu PDHJ balun katak sosiedade lamenta barak kona-ba asesu justisa iha nasaun TL la'ós de'it atendementu iha PJR maibé iha tribunál mós.
Nune'e ba oin importante tebes atu PDHJ, PJR, defensoria públika estadu, presija iha kooperasaun mutua, tanba konstituisaun garante reparasaun injustisa, tanba prosesu justisa kleur foin sai, entaun viola fali sira-nia direitu, asesu ba justisa, nune'e presija kooperasaun mutua nune'e ida-idak bele halo nia knaar, mais importante ne'e halo atendementu ne'ebé responsável no lalais atu sosiedade hotu-hotu bele asesu ba ho justisa ho dignu.
"Ami halo levantementu dadus balun ne'ebé relevansia ba detidu sira, prizioneiru sira iha kadeia, dalaruma la hetan asistensia husi defensor no prokurador, buat sira-ne'e hotu, ha'u hanoin ida-ne'e importante atu sira foti asuntu ne'e ho sériu mezmu sira komete krime maibé naturalmente prosesu justisa ne'e nafatin tuir regra nune'e labele viola sira-nia direitu justisa", nia enkoraja.
