Ministeru Interior, Francisco da Costa Guterres, hatete, prosesu rekrutamentu ba membru polisia foun, tuir lolos hala’o ona iha fulan-Juñu ne’e nia laran, maibé tanba sei hein hela promulgasaun ba diploma ministerial ne’e.
“Rekrutamentu ba kadetes foun ne’e sei hein diploma ministerial no sei halo publikasaun iha fulan-Juñu ne’e nia laran,”dehan nia ba jornalista sira, hafoin remata reuniaun Konsellu Ministeru, iha Palasiu Governu, Dili, Kuarta (18/06/25).
Governante ne’e hatutan, bainhira diploma ministerial ne’e promulga ona maka sei estabelese ekipa juri no mós komisaun tomak ne’ebé sei tau matan ba rekrutamentu ne’e.
“Iha diploma ministerial ne’e ita indika ona juri ne’ebé maka sei halo rekrutamentu no komisaun tomak, ne’ebé kuando diploma ne’e promulga ona, pronto Polisia nasional Timor-Leste hahú ona prosesu informasoens, para depois sira publika ba públiku no mós publika ona planu rekrutamentu to’o fin dezembru,”tenik Ministru Interior.
Nia akresenta tan katak, diploma ministerial ne’e prepara hotu ona no hein publika iha Jornal da Republika.
“Ami sei pauza uituan, tanba sei iha prosesu promosaun nia laran ne’e, agora promosaun hotu ona, ita avansa ba rekrutamentu,”
Entretantu, tuir planu, iha rekrutamentu membru polisia foun ne’e hamutuk na’in 500, na’in 400 sei partisipa iha kursu formasaun ba ajente no na’in 100 sei partisipa iha kursu formasaun ba ofisial.