Prezidente Bankada FRETILIN, Francisco Miranda Branco hateten, alokasaun orsamentu ba saláriu no vensimentu to’o fulan Dezembru 2017 sei bele garantidu, maibé ba fulan-Janeiru 2018 bele mosu problema tanba laiha alokasaun orsamentu.
“Ha'u hanoin iha fulan ida ne’e to’o Dezembru 2017 orsamentu sei iha, maibé Janeiru 2018 ba oin ne’e mak ha'u preokupa ona”, dehan nia, iha Uma Fukun PN, Sesta, (20/10).
Nia hatutan, agora daudaun governu sei uza hela Orsamentu Jerál estadu (OJE) 2017 nian, maibé iha fulan Janeiru 2018 ba oin difisil ona, tanba orsamentu anuál ne’e sei termina iha Dezembru 2017.
Nia hatutan, desizaun sira ne'ebé opozisaun halo ona ne’e la haree ba nia impaktu, maibé tanba de'it polítika vingansa hodi halo buat ruma la tuir ona nia dalan.
Nia hatutan, maski opozisaun sira halo ona mosaun rejeisaun ba Programa VII Governu Konstitusionál, maibé governu ne’e sei la monu kedas iha tempu agora. Sei mosu Governu Jestaun hodi funsiona governu ne’e to’o fulan Janeiru hafoin Prezidente Repúblika foti desizaun.
Nia hatutan, Governu Jestaun sei la’o hakat ba eleisaun antesipada ka lae, ne’e depende ba kompeténsia Prezidente Repúblika hodi foti desizaun tuir Konstituisaun haruka.
Branco sente lamentavel tebes ho situasaun polítika oras ne’e daudaun, tanba jerasaun tuan sira la rai kultura polítika di'ak ba jerasaun foun sira ba aban-bainrua nian.
Timor-Leste iha ona faze atu tama ba tranzisaun jerasional, nune’e presiza tebes lideransa tuan sira hatudu ezemplu di'ak ba jerasaun foun atu banati tuir, hodi lori nasaun ba oin, maibé realidade sira la hatudu.
Iha fatin hanesan, Deputada Nurima Alkatiri hateten, daudaun ne’e Governu Jestaun no Parlamentu Nasionál funsiona nafatin hanesan baibain, hodi buka dalan hametin nafatin estabilidade governativa to’o Prezidente Repúblika foti desizaun.
Nia mós hatutan, katak konstituisaun la fó dalan atu Governu ida tun-ida seluk sa’e fali, ne’e la'ós uma kain ida, atu halo buat ruma konforme ema ida-idak nia hakarak.
Maibé, Konstituisaun iha atu hatudu dalan hodi la’o tuir, tanba ne’e opozisaun halo rejeisaun ba programa governu atu monu, maibé governu jestaun sei kontinua.
