Prezidente INSP-TL, Nívio Sarmento hatete, númeru mate tanba raiva aumenta husi 22 ba 24, hafoin kazu foun rua ne’ebé foin daudauk relata.
“Iha kazu akumulativu 6.110 kazu asu tata, iha 24 mortos akumuladu. Entrevista ikus ne'ebé mak ha'u halo ba média sira iha 22 mortos, maibé iha tan kazu mortos rua ne'ebé mak relatá iha loron rua ba kotuk, entaun ita hamutuk 24 mortos," dehan Nivio ba jornalista sira, hafoin partisipa programa Kafé Dader iha RTTL, Kaikoli, Kuarta (04/02).
Nia dehan kazu foun ne’e mai husi Munisípiu Ainaro no Likisá, no to’o agora Díli seidauk relata kazu mate relasiona ho raiva. Kona-ba idade vítima sira, nia dehan seidauk iha detallu kompletu iha relatóriu.
Nívio subliña prevensaun raiva depende loos ba intervensaun vasinasaun masa ba animál, liu-liu asu, ne’ebé halo hamutuk ho Ministériu Agrikultura, Peskas, Pekuária no Floresta (MAPKF) liu husi Diresaun Nasionál Pekuária.
“Intervensaun liña primeiro mak mai duni husi Diresaun Nasionál Pekuaria i ita husi saúde prepara aimoruk liu husi INFPM, bainhira kazu ne'e mai duni fó vasina atu nune'e bele prevene,” dehan nia.
Hakarak lee notisias nee kompletu, asesu deit pajina e-paper INDEPENDENTE: https://digital.independente.tl edisaun kuarta (05/02).
Iha kazu balun, bainhira asu tata lakohi relata no lakohi hakbesik an fasilidade saúde atu bele hetan lalais tratamentu.
Tan ne’e, MS nafatin alastra ba komunidade sira maske daudaun ne'e iha situasaun dengue nia laran maibé husu atu asu tata ba lalais fasilidade saúde nune'e bele hetan tratamentu.
"Maske númeru kobertura sona ba asu sira sa'e tan ona maibé ita tenke haree nafatin katak iha fatin balun asu seidauk vasina," dehan nia.
Molok ne’e, Diretór Servisu Apoiu Diagnóstiku no Terapeutiku, HNVG, Vidal de Jesus Lopes hatete, kazu raiva ne’e rejista dezde 01 to’o 31 Janeiru 2026.
Nia afirma katak, raiva foin bele deteta bainhira pasiente hatudu sintomas.
"Hahú husi loron 01 to'o 31 Janeiru 2026, maluk sira ne'ebé mak asu tata mai ne'e hamutuk 37. Husi númeru ne’e na'in rua mak aprezenta sintomas raiva no ida ita la konsege salva," dehan Vidal ba Jornalista sira, iha nia kna'ar fatin, Bidau, Segunda (02/02).
Vidal informa, pasiente na’in ida ne’ebé lakon vida mai husi Kasa, Ainaro. Enkuantu na’in ida seluk husi Likisa, nia mais simu vasina anti-raiva no fila ona ba uma.
Entretantu, iha tinan 2025, tuir dadus husi Organizasaun Mundial Saude (OMS), durante fulan 18 nia laran, raiva hamate ona ema na’in 20 no hadaet ona ba munisipiu hitu iha teritoriu Timor-Leste.
