Tanba situasaun ne’e, KAK daudauk ne’e halo hela akompañamentu ba implementasaun projetu refere iha terenu no bainhira identifika indisius krime, sei prosesa ba Ministériu Publiku (MP).
“Monumentu Memoriál Masakre Santa Kruz ne’ebé kompaña Bololaid Unipesoal Lda ezekuta ho osan millaun ida ne’e atraza tebtebes, nune’e KAK sei haree, bainhira iha indísiu krime, KAK prosesa kompaña Bololaid Unipesoal Lda,” dehan Komisariu KAK, Rui dos Santos, iha knaar fatin, Faról, Sesta (22/05).
KAK, nia dehan, bele uza artigu kona-bá fraude konstrusaun no krime seluk ne’ebé previstu iha Lei nú. 7/2020 atu lori kazu refere ba prosesu legal no eventual kondensaun ba parte ne’ebé sala.
Projetu Jardim Memoriál Masakre Santa Kruz, nia dehan, daudaun sai ona objetu atensaun husi KAK relasiona ho kualidade no ezekusaun projetu fíziku.
Rui hatete, projetu ne’e la’o durante mandatu governu daualu, no bazeia ba deklarasaun husi Ministru Asuntu Kombantente Libertasaun Nasionál, Gil ‘Oan Soru’ katak estatua ba memorial ne’e halo iha Portugal ho valor kontratu hamutuk rihun $300.
“Osan $300,000 uza hotu tiha maibé estatua seidauk mai. Ita atu halo saida?Tanba ema ne’ebé viola ne’e la’ós ema iha rai laran, maibé ema rai li’ur,” Rui hatete.
Tuir nia, problema ne’e envolve parseiru kompaña iha rai li’ur, nune’e presiza kooperasaun entre setór justisa sira atu bele halo investigasaun kona-bá osan ba estatua.
Entretantu, iha 12 Maiu 2026, Adjuntu Komisáriu KAK, Rosario Salsinha Araújo no Miguel Acácio Faria halo Vizita bá Ministériu Asuntu Kombatente Libertasaun Nasionál hodi konfirma progresu konstrusaun Monumentu Memoriál Masakra Santa Kruz.
Projetu obra ne’e tuir planu tenke remata iha 22 Setembru 2022 ho montante orsamentu hamutuk $1,385,389.88.
KAK mós halo ona inspesaun iha 13 Juñu 2023 no hasoru responsavel empreza Borbolait Unipesoal Lda.
Durante akompañamentu tinan rua resin, KAK apura ona informasaun barak hodi prepara relatóriu deskobrimentu ba Komisáriu KAK.Husi deskobrimentu sira ne’e, identifika katak iha problema balun ne’ebé kontribui ba atrazu no falla iha prosesu konstrusaun, liu-liu iha aspetu polítika, administrasaun, jestaun finanseira no legal.
