Manager Kompañia Robena Unipesoal,Lda, Ferdinan Xila hatete, kontrusaun ba moru protesaun iha areador Altar Tasi-Tolu ne’e responsabiliza husi Kompañia Robena Unipesoal,Lda, nune’e, prosesu konstrusaun ne’e to’o ona pursentu 60.

"Ha'u hanoin, hela semana rua hanesan ne'e ami bele halo hotu ka cor hotu moru protesaun ne’e, tanba nia maka kuantidade boot. Iha fulan kotuk konstrusaun ne'e to’o ona 50% no agora daudaun konstrusaun ne'e to'o ona 60 % liu,”dehan nia ba Online INDEPENDENTE, iha Tasi-Tolu, Dili, Segunda (14/07/25).

Nia hatutan, tuir termu kontratu ne’ebé iha, durasaun tempu ba konstrusaun ne’e durante fulan-ualu, hahú husi loron 19 fulan-Dezembru tinan 2024 no sei termina iha loron 12 fulan-Jullu tinan 2025, maibé konstrusaun refere seidauk finaliza.

Ho nune’e, Kompañia deside submete hikas pedidu extensaun ba iha Ministeriu Planeaneamentu no Investimentu Estratéjiku hodi extende tan prosesu konstrusaun ne’e to’o Dezembru tinan ne’e.

“Konstrusaun moru refere ho durasaun fulan 8 no besik remata ona, kontratu ne'e hahú husi dezembru no sei remata iha 19 de jullu 2025, ne'ebé agora sei falta loron 5, maibé seidauk hotu, ho nu'une ami nia prosesu extensaun kontratu ne'e ami submete ona iha fulan kotuk, antes de semana rua ou fulan ida bazeia ba kontratu ne’ebé maka hakerek iha kontratu laran,”tenik nia.

Nia esplika, moru protesaun iha areador Altar Tasi-Tolu ho nia medida naruk 2,8 kilometru no nia aas hamutuk 2.4 metru.

“Moru ne'e nia naruk 2,8 km, area ne'ebe maka sei mamuk nia kobre hotu, nia a'as 2,4 m, la'os full block maibé metade dei't ho batako rua ho 50 centi, depois hotu ami sei monta pagar bersi, hotu ida ne'e, ami entrega ona ba Estadu,”haktuir Manager ne’e.

Manager ba Kompañia Robena Unipesoal,Lda haktuir tan katak, dezafiu ne’ebé durante ne’e sira hasoru iha terenu maka impedementu husi komunidade sira ba projetu refere, maibé Kompañia konsege resolve no buat hotu la’o normal.

"Durante ami-nia servisu, difikuldade ne'ebé ami hasoru boot liu maka impedimentu husi komunidade, hasoru problema sosial maibe ami rezolve hotu ona, agora ita haree katak servisu la'o normal hela, tanba momentu hari moru ne'e kona hotu ema-nia uma no dalan, ema liu la di'ak, entaun ami ko'alia ho Dono de projetu, ikus mai ami husik hela metru 4 hodi komunidade bele liu ba mai, problema mós ho bada'en sira ,iklima mós fó impaktu ba ami-nia servisu,”esplika nia.

Ho nune’e, Kompañia ne’e garante katak iha fulan-Dezembru tinan ne’e, bele finaliza projetu konstrusaun refere, hodi entrega ba parte Governu.

Entretantu, total orsamentu ba projetu konstrusaun ne'e hamutuk $937.087.55.