Projetu 45 Laiha Kontratu Featured

By Artur da Luz Outubru 03, 2018 2467
Ezemplu: Estrada nakfera iha maubara Ezemplu: Estrada nakfera iha maubara

DILI: Ministériu Obras Públika (MOP) halo identifika ona projetu 142 ne’ebé deputadu kestiona iha diskusaun OJE 2018. Husi totál ne’e hetan projetu hamutuk 45 konsidera ilegál tanba laiha kontratu servisu.

Ne’e duni, Governu hein rezultadu fiskalizasaun husi téknika atu bele halo pagamentu ba kompañia ne’ebé kaer projetu ‘siluman’ ne’e.

Ministru Obras Públika (MOP), Salvadór Eugénio Pires hateten, husi totál projetu ne’ebé hala’o iha tempu governu anteriór, projetu hamutuk 97 maka prienxe prosedimentu legál.

Maski nune’e, Governu kontinua hein Komisaun Eventuál Inkéritu Parlamentár (KEIP) hamutuk ho empreza sira hodi fiskalizasaun, bainhira projetu sira iha kualidade MOP sei konfirma dokumentu atu halo pagamentu.

“Ida ne’e sujeitu ba Komisaun Eventuál Inkéritu Parlamentár halo inspesaun”, dehan Salvadór, iha Edifísiu ADN Fatuhada-Dili, horisehik.

Nune’e, Governu halo ona pagamentu ba projetu 14 altura ne’ebá kategoria urjénsia, maibé la esplika detalla montante orsamentu ne’ebé pagamentu ba projetu emerjénsia ne’e.

Tuir Salvadór, montante orsamentu ne’ebé Governu halo pagamentu ba projetu 142 hamutuk tokon $300. Ne’e duni, iha ezekusaun OJE 2018 fulan rua nia laran, Governu sei foti fundu infraestrutura atu halo pagamentu.

Tipu projetu sira ne’e mak konstrusaun sivil sira liuliu estrada, ponte, eletrisidade ne’ebé antes ne’e Governu anteriór halo kontratu ho empreza sira.

Entretantu, Diretór Ajénsia Dezenvolvimentu Nasionál (ADN), Samuel Marçal hateten, projetu sira ne’ebé aprova iha inkéritu parlamentár mak halo pagamentu.

Tanba ne’e, bainhira halo pagamentu presiza mós rekomendasaun no verifikasaun husi ekipa tékniku iha terrenu, bainhira fiskaliza projetu sira iha kualidade Governu promete halo pagamentu.

 

Rate this item
(0 votes)

Independente Digital TV

Tuir ami iha Twitter

Kalendariu Notisia

« July 2024 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31