PM Xanana dehan, Xefe Estadu Ramos-Horta agradese tebes, tanba programa Governu nian ba tinan lima (2023-2028) foka ba área priodade sira ne’ebé Konsellu Ministru deside no aprezenta ona ba Parlamentu Nasionál.

“Ne’e dehan primeiru enkontru ofisiál entre Sua Exelénsia Prezidente Repúblika ho Primeiru-Ministru, mai aprezenta programa ba tinan lima aprovadu, tan-ne’e maka horseik (kuarta) aprova ona programa, kontente tanba aprova ho unanimidade ne’ebé hatudu espíritu atu servisu hamutuk hodi hametin Estadu Direitu Demokrátiku,” informa PM Xanana, hafoin remata reuniaun ho PR iha Palásiu Prezidensiál Bairu Pité, Dili, (20/07).

PM Xanana hatutan ba Xefe Estadu iha semana ne’e sei hala’o reuniaun Konsellu Ministru hodi deskute mós lei organika liña ministériu no sekretariu estadu sira nian.

Governu mós hala’o ona preparasaun atu aprezenta orsamentu retifikativu ba Parlamentu Nasionál ne’ebé kada liña ministériu no sekretariu estadu sira sei prepara sira nia planu anuál no programa ne’ebé sei implementa iha tinan ida ne’e.

Entretantu, Programa Governu Konstitusionál IX foka ba área prinsipál neen, hanesan, afirma filafali Estadu Direitu Demokrátiku, dezenvolvimentu kapitál sosiál, dezenvolvimentu infraestruturas, dezenvolvimentu ekonomia, konsolidasaun governativa no boa governasaun, no kombate hasoru korrupsaun.