"Ho gratidaun klean tebes, Prezidente Repúblika fó omenajen espesiál ba ita nia maun-alin murak, jornalista, Max Stahl, iha loron ita komemora loron Masakre 12 Novembru ba dala-30 iha Santa Kruz,”dehan Xefe Estadu, sesta ne’e (12/11).
Xefe Estadu haktuir, Timor-Leste komemora Masakre 12 Novembru 1991 no iha tinan 2021 ne’e, selebra misa funeral no mós fó omenajen ba Saudozu Jornalista Max Stahl ne’ebé lao dadaun iha Brisbane, Australia.
Lori naran Estadu Timor-Leste, Prezidente Repúblika haruka hakoak bo’ot ba família Max Stahl nian, família erois juventude loriku As’wain nian no mós ba família hotu erois ba libertasaun nasional nian.
“Timoroan ra'an fakar iha ne'e tinan tolu nulu liu bá, hafoin imájen Masakre Santa Cruz, kapta husi Saudozu Jornalista Max Stahl hodi to’o iha rai liur, nune'e mak opiniaun públika internasional muda situasaun iha Timor- Leste,”tenik nia.
Nune’e, husi ne'e mak movimentu solidariedade internasional ho Timor-Leste sa'e liután no ba beibeik, ho envolvimentu maka'as husi diplomata no ativista Timoroan iha diaspora.
“Juventude Lorico As’wain ohin ita mai halibur iha fatin ida ne’e, atu valoriza liután erói no mártir sira nia memória, liu-liu ba sira ne’ebé barani halo manifestasaun, iha 12 novembru 1991 hodi afirma ita nia mehi koletivu ba “Ukun rasik An”.
Asistente Editor: Saturnina da Costa
