PR Horta hatete, Amu Papa foun, Leão XIV, ne’ebé eleitu iha Setembru tinan kotuk hodi subtitui Papa Francisco, iha koñesimentu ne’ebé klean kona-ba Timor-Leste.

“Ami ko'alia kona-ba situasaun Timor-Leste, Amu Papa hatene di'ak liu tan, tanba Santa-sé sira-nia informasaun 100%," dehan Horta liu husi konferensia imprensa iha Palasiu Prezidensia, Bairo-pite, Segunda (24/11).

Tuir Horta, enkontru bilateral hanesan ne’e baibain menutu 15 de’it, maibé nia koalia ho Amu Papa to’o menutu 30.

“Momentu ne'ebá sira hatete ba ha'u ‘enkontru ne'e normál 15 minutes mós di'ak ona’. Mais derrepente Amu Papa Leão XIV haree oras, ha'u haree oras meia ora tiha ona. Ha'u hatete ‘Amu Papa, di'ak liu ha'u sai ona, sira hein karik iha li'ur hela. Se ha'u la hatete karik buat ruma di'ak liu ha'u labele naok tan, lakon tan ita-boot nia tempu, reuniaun bele kontinua de'it,” dehan Horta.

Iha sorumutu ne’e lider na’in rua ne’e koalia kona-ba situasaun nasional no dezenvolvimentu Igreja Katolika iha Timor-Leste, no koalia mós kestaun global sira hanesan konflitu Gaza, Palestina, Myanmar, no krize umanidade iha nasaun sira seluk iha mundu.

Tuir Horta, Amu Papa ne’ebé ho idade tinan 79 ne’e nu’udar atleta, multilingual no iha koñesimentu ne’ebé luan.

“Amu Papa ida ne'ebé antes sai Amu Papa nia vida nia ba rai 50, nia koñese mundu,” PR Horta hatete.

Xefe Estadu ne’e esplika, ninia vizita ba Vatikanu nu’udar Xefe Estadu hanesan tradisaun diplomatiku ne’ebé jeralmente halo husi lideransa nasaun sira iha mundu—tantu nasaun Katolika no naun-Katolika—hodi aprejenta komprimentu ba Amu Papa foun ne’ebé hetan hili.

Simu ho ksolok bainhira to’o TL

PR Horta ho delegasaun fila hikas mai Timor-Leste iha Segunda (24/11). Bainhira tuun husi aviaun iha aeroportu, simu husi Vise Primeiru Ministru, Mariano Assanami Sabino, no kontinua ho guarda onra, no mós entrega aifunan no tara tais husi labarik sira.

Bainhira sai husi sala VIP, lia nain sira simu PR Horta iha odamatan. Hafoin kontinua sa’e karreta Moke no hahú viajen ba Palasiu PR ne’ebé akompaña ho drum band no husi estudante, no komunidade sira forma iha dalan ibun—hanesan ho saida mak halo ona bainhira PR Horta ho PM Xanana fila husi Malázia foin lalais ne'e.

‌To'o iha Palásiu Prezidensiál Repúblika, sei iha reseisaun husi Drum Band, Moradores, orfanatu no funsionáriu Palásiu Prezidensiál Bairu-Pite.