Iha jogu  dahuluk, bainhira arbitru fó sinal, armada husi Ekipa selesaun rua halo kedan kontra atake ba malu tuir tátiku no ablidade ne’ebé sira iha.

Iha jogu ne’e, Ekipa portuguesa ne’e koko halo kontra atake ba maka’as ba Angola ho agresivu, maibé ekipa ne’ebé mai husi  kontinente Afrika ne’e mai ho estatejia ne’ebé iha hodi halo kontra atake no la fo oportunidade ba Portugál hodi marka golu ruma.

Ritmu jogu ne’ebé aas, jogador sira fahe bola ba malu husi ain-ba-ain, hodi buka oportunidade no failansu husi liña defeza ida-idak hodi  bele aproveita, bele produs golu ruma hodi muda score.

Ho atmosfera iha estádiu Dili, adeptus atus ba atus ne’ebé iha tribuna leten, balun tuur no balun hamriik hodi fo suporta masimu ba ida-idak nia ekipa, liu husi hú korneta, baku kalen, hakilar no haklalak halo estádiu sai animadu liutan.

Maibé suporta hirak ne’e, atmosfera jogu manas liu tan, ekipa Angola ne’ebé hala’o jogu kontra atake liu husi jogadór liña mediu, parte los no parte karuk, hodi oferese bola barak ba liña avansasu hodi rezultada  sutu barak, maibé seidauk kona nia alvu.

Maske nune’e, Ekipa Portugál mos liu husi liña mediu parte loos, kria oprtunidade hodi lansa sutu lubuk ida, maibe sei antisipa ho di’ak husi Guarda rede Angola nian.

Husi forsa ne’ebé ekipa rua iha, kuaze atu hanesan, tanba jogu to’o primeira parte termina la rezultadu golu ba ekipa rua, nune’e rezultadu impata 0-0.

Hakat ba  jogu segundu, Ekipa rua nafatin halo kontra atake ba malu liu ho ritmu jogu ne’ebe as liu tan, maibe liña defeza ekipa ida-idak solidu tebes. Ekipa Angola ne’ebé halo jogu agresivu ho lansa kontra atake ne’ebé lais hodi hodi lansa sutu, maibé seidauk to’o nia tarjetu.

Iha liña kampu ninin, Ekipa treinadór husi ekipa rua ida-idak fo orientasaun ba sira nia jagadór hodi bele muda tátiku no estratejia hodi bele produs golu, maibé orientasaun ne’ebé treinadór oreinta ba jogadór sira seidauk hetan rezultadu ne’ebé pozitivu.

Jogu segunda parte ne’ebé la’o ho tensi jogu ne’ebé aas, Ekipa Angola komesa domina bola iha kampu laran, nune’e halo ekipa Portugal susar atu hetan bola, tanba ne’e obriga liña defeza Portugál tenke  haka’as aan, atu bele trava netik Ekipa Angola labele produs golu.

Husi Ekipa Angola ne’ebé domina bola, konsege kria oportunidade barak ba hodi produs golu, maibé oportunidade hirak ne’e hela de’it ho esperansa, tanba jogadór sira la uza didi’ak oportunidade hirak ne’e, nune’e to’o segunda parte termina ekipa rua tenke fahe pontu ba malu ho score 0-0.

Husi rezulatadu ne’ebé iha, Portugál ho pontu haat, Angola ho pontu haat, Cabo Verde pontu tolu, enkuantu Timor-Leste pontu zero.