PNTL Konsidera Pedidu Manifestasaun Kontra MJ Carceres Featured

By Domingos Gomes Jullu 28, 2020 833
Komandante Daruak PNTL Dili, Superintendente Polisia Euclides Belo. Komandante Daruak PNTL Dili, Superintendente Polisia Euclides Belo.

DILI: Polisia Nasional Timor-Leste konsidera karta pedidu Front Mahasiswa Timor-Leste (FMTL), ne’ebé tuir planu sei halo manifestasaun kontra esbosu Kriminaliza Difamasaun ne’ebé ‘inisia’ husi Ministru Justisa Manuel Carceres.

Tuir pedidu ba PNTL Munisipiu Dili, FMTL sei hamutuk ho sosiadade sivil, akademiku, komunidade media, no populasaun baibain atu halo iha loron 3 fulan-Agostu 2020.Asaun ne’e rasik sei hala’o iha Ministériu Justisa (MJ) nia oin.

Komandante Daruak PNTL Dili, Superintendente Polisia Euclides Belo informa, PNTL Dili simu ona karta pedidu husi FMTL ho asuntu kona-ba asaun pasifiku kontra esbosu kriminaliza difamasaun.

“Karta pedidu husi Front Mahasiswa Timor-Leste ami simu no konsidera, maibé ami sei halo komunikasaun ho sira par bele kumprimenta lei númeru 1/2006 ne’ebé regula kona-ba liberdade reniaun no halo manifestasau, nune’e fasil ba ita atu halo koordenasaun,”dehan Euclides ba jornalista sira iha nia kna’ar fatin, Kaikoli, horseik.

Ho pedidu ne’e, Euclides hatete, PNTL prontu asegura seguransa ba asaun ne’ebé FMTL organiza.

Iha fatin hanesan, portavoz FMTL Nevelino dos Santos hatete, FMTL hato’o ona karta koñesimentu ba PNTL Dili hodi bele asegura seguransa iha prosesu manifestasaun kontra esbolsu kriminaliza difamasaun.

Nia informa, sira deside ona loron ba manifestasaun no fatin, maibé sei hein notifikasaun husi PNTL atu halo audensia ho sira hafoin bele iha serteza.

“Ita sei halo manifestasaun iha loron 3 Agostu, maibe ida ne’e loron tentativa, tanba ita sei hein notifikasaun husi autoridade seguransa ba ita, bainhira halo ona audensia ho sira kona-ba fatin, bainhira hahú PNTL bele fó seguransa,” dehan nia.

Portavoz ne’e dehan, asaun pasifiku sei envolve husi sosidade sivil, akademista, no jornalista.

Molok ne’e, Akademiku, sosiadade sivil, no reprezentante jornalista sira konkorda malu ona atu halo asaun pasifiku kontra Ministru Justisa Manuel Carceres ‘urusan’ (U) hodi kontra esbosu kriminaliza difamasaun. Ho nune’e, tuir planu, ohin, Segunda (27/07), Front Mahasiswa Timor-Leste (FMTL) sei hatama karta koñesimentu ba Polisia Nasionál Timor-Leste (PNTL).

Portavoz FMTL, Novelino dos Santos informa, iha Domingu (26/07) liu husi reuniaun entre FMTL ho senadu universitariu sira no reprezentante sosiadade sivil sira, deside ona atu halo manifestasaun kontra MJ Carceres ‘U’.

Tuir planu, nia hatutan, iha 27 Jullu, FMTL sei hato’o karta koñesimentu ba PNTL kona-ba asaun pasifiku ne’ebé sei hala’o iha 3 Agostu 2020.

“Ami deside ohin katak, karta ne’ebé ami prepara ona atu fó koñesimentu ba PNTL (katak) iha dia 3 (Agostu), iha Segunda-feira, ita sei halo asaun pasifika hodi hasoru Esbosu Lei Kriminalia Difamasaun ne’e,” informa Portavoz FMTL ne’e ba jornalista INDEPENDENTE hafoin reuniaun iha salaun Asosiasaun HAK, Domingu (26/07).

Nia hatete, iha Segunda (27/07), nia parte sei hato’o karta koñesimentu ba PNTL no sei hein audensia ho PNTL, hodi diskuti no antisipa parte balun infiltra iha asaun ne’ebé sei hala’o iha 3 Agostu.

“Ida ne’e (3 Agostu) hanesan data tentativa ida, maibé inprinsipiu atu hatete de’it katak preparasaun ida ohin husi Front Mahasiwa Timor Leste prepara kondisaun ba enkontru preparasaun asaun pasifika iha tempu badak, no ohin ita mós konvida entidades hotu-hotu hanesan, Assosiasaun Jornalista Timor-Leste no sosiedade sivil sira ne’ebé mak la aseita ho esbosu Lei Kriminalia Difamasaun.”

“Sira-nia partisipasaun masimu tebtebes. Ohin, ita mós fahe ona serbisu ba seksaun tekniku ninian hanesan divijaun, logistika, seguransa, koordenador kampu no portavoz hodi halo preparasaun ida mais efetivu liu,” nia dehan.

Rate this item
(0 votes)

Independente Digital TV