Parlamentu Nasionál nu’udar órgaun autónomu ida iha rasik lei orgánika funsionamentu administrasaun parlamentár no autonomia finanseira patrimoniál hodi bele jere rasik.

Ami iha lei orgánika hodi jere rasik patrosíniu Estadu iha Parlamentu Nasionál”, dehan Sekretáriu Jerál Parlamentu Nasionál (PN), Mateus Ximenes Belo, iha knaar fatin, horisehik.

Antes ne’e, Diretór Diresaun Nasionál Patrimóniu Estadu (DNPE), Martinho Lopes hatete, tuir lei kualkér sasán Estadu nian ne'ebé utiliza ona liu tinan lima atu halo leilaun bele lori ba DNPE hodi rejista no loke prosesu leilaun ba publika ho presu ne'ebé boot tuir kondisaun karreta.

Nia mós hatutan, karreta Prado Parlamentu Nasionál (PN) 65 mós tuir lei bainhira hakarak halo leilaun bele lori ba DNPE.

Hataan ba ida ne’e, Sekjer PN Mateus Belo hatete, DNEP halo prosesamentu ba leilaun karreta husi órgaun soberania seluk, maibé parlamentu nasionál tuir lei konstituisaun mós fó dalan ba instituisaun autonomia sira atu halo jestaun rasik ba nia patrimóniu.

“Tanba ne’e, ami iha ne’e osan Estadu nian ne'ebé revé mai iha Parlamentu Nasionál mós ami jere rasik tuir nesesidade instituisaun, tuir lei haruka,” tenik nia.

Nia hatutan, iha tinan 2012, kompañia Auto Timor mak sai hanesan ajente fornesidor karreta Prado. Tanba ne’e, parlamentu nasionál mós deside kontratu ho sira atu bele halo mós manutensaun ba karreta sira ne’e kuandu hetan fallansu ruma.

Nia hatutan, iha órgaun soberania sira seluk hanesan Prezidente Repúblika no Governu mós iha autonomia jestaun administrasaun finanseira no patrimoniál. Ne’e duni, konforme sira atu halo jestaun hakarak atu halo kontratu ho lojístika nasionál atu halo manutensaun. Polítika tuir ida-idak nian administrasaun mak deside.