PN: Dr. Daniel Merese Hetan Kondekorasaun Estadu Featured

By Aquno Gomes Abril 15, 2020 2132
Matebian Dr. Daniel Matebian Dr. Daniel

DILI: Prezidente Parlamentu Nasionál Arão Noe de Jesus Amaral hatete, Diretór Klinika Bairro-píte, matebian Dr. Daniel Murphy merese hetan kondekorasaun husi estadu Timor-Leste.

“Timor-Leste ita lakon figura importante ida ne’ebé durante servisu makaas liu desde tempu Indonezia too mate nia servisu no servi iha parte saúde nian,”dehan Arão, iha Parlamentu Nasionál, kuarta (15/04).

Dr. Daniel funda Klinika Bairo-Pite iha tinan 1998, ne’ebé fó tratamentu saúde ba timor-oan afeitadu husi konflitu 1999.

Araõ dehan, matebian Dr. Daniel Murphy harii klinika Bairro-Píte ho esforsu rasik la liu husi Estadu.

Matebian buka rasik fundus husi liur hodi bele sustenta klinika ne’e. Mesmu iha tinan hirak ba kotuk iha difikuldades kona-ba finanseiru, maibé nia mantein nafatin no nia dediksaun, klinika ne’e funsiona to’o nia rasik mate.

Tanba ne’e, Timor-oan no Estadu Timor-Leste lakon boot figura importante ida no halo rekursu boot ba area saúde nian relasaun ba atendimentu di’ak ba Timor-oan no haruka timor-ona ba halo tratamentu iha Australia ida ne’e mak esforsu tebes matebian nian durante nia moris.

“Nia merese atu hetan kondekorasaun ruma husi estadu no Parlamentu Nasionál konsidera mós atu bele fó votu pezár ba nia kontribuisaun ne’ebé durante ne’e ba sidadaun Timor-Leste liu-liu iha area saúde ninian,”dehan nia.

Entretantu matebian Dr. Daniel Murphy hakotu iis iha ninia rezidensia praia dos Coqueiros, iha loron tersa (14/4), maio-menus kalan tuku 20:30 oras Timor-Leste.

Rate this item
(0 votes)

Independente Digital TV