Prezidente Parlamentu Nasionál, Aniceto Longuinhos Guterres Lopes, anunsia votasaun projetu rezolusaun númeru 101/V(4a), referente dezlokasaun Prezidente Repúblika ba Commenwealth-Australia a-favór 26.

"Projetu rezolusaun númeru 101 passa, Parlamentu Nasionál liu husi komisaun permanente fó ona konsentimentu ba viajen Prezidente Repúblika ba Cammonwealth-Austrália," deklara Aniceto Guterres, iha plenária PN, horisehik.

Hafoin ne'e, Parlamentu Nasionál halo votasaun ba projetu rezolusaun númeru 102/V(4a), relativamente partisipasaun iha 77 sesaun Assembleia Jerál Nasoins Unidas, iha Novaiorkem ho rezultadu votasaun a-favór 26.

"Projetu rezolusaun númeru 102/V(4a) passa, ho ida-ne'e Parlamentu Nasionál fó konsentimentu Prezidente Repúblika atu vizita ba Estadu Unidus Amérika, atu partisipa iha Assembleia Jerál Nasoes Unidas ho enkontru sira seluk relasiona ho Assembleia Nasoes Unidas ni'an," dehan nia.

Tuir pedidu ne'ebé diariu ne’e asesu, Prezidente Repúblika husu konsentimentu ba Parlamentu Nasionál bazeia númeru 1 husi artigu 80 no alínea h) husi númeru 3 husi artigu 95 Konstituisaun Repúblika Demokrátika Timor-Leste nian.

Husu ba Parlamentu Nasionál atu husu autorizasaun atu bele halo vizita Estadu ba Austrália iha loron 3 to'o 11 setembru, tuir konvite husi  Governadór Jerál Austrália, David Hurley.

Nune'e, partisipasaun iha sesaun 77 Asembleia Jerál Nasoins Unidas iha simeira nivel aas Xefe Estadu nian ne'ebé organiza husi g7+ no soru-mutu nivel aas komisaun nian "Peacebuilding" husi Nasoins Unidas, iha loron 21 to'o 30 Setembru, iha Novaiorke, Estadus Unidus Amérika.