Orsamentu ho montante tokon US$ 1.348.664 kompostu husi saláriu vensimentu US$ 771.480, bens servisu US$ 557.184, kapitál menor US$ 20.000.
Iha OJE 2026, Sekretária Estadu Igualdade Inkluzaun (SEII) sei implementa tuir programa rua ne'ebé define hanesan funsionamentu no dezenvolvimentu institusionál no ida seluk mak programa inkluzaun sosiál, husi programa rua ne'e fahe ba sub-programa hamutuk ualu no atividade 22.
Kona-ba programa funsionamentu no dezenvolvimentu institusionál nian ho totál orsamentu US$ 788.986, kompostu husi saláriu vensimentu US$ 484.532, bens servisu ho montante US$ 290.454 no kapitál menor hamutuk US$ 14.000.
Ba programa inkluzaun sosiál totál orsamentu hamutuk US$ 559.678, ne'ebé fahe ba kategória saláriu vensimentu US$ 286.948, bens servisu ho montante US$ 266.730 no kapitál menor hamutuk US$ 6.000.
Sekretária Estadu Igualdade, Elvina Sousa Carvalho hatete, governu komprometida atinje ninia meta sira tuir programa ne'ebé mensiona iha proposta OJE 2026, maski ho orsamentu neʼebé natoon maibé sufisiente hodi kobertura sprsograma sira-ne'e hotu.
Nia dehan, polítika Governu konstitusionál da-sia sei la tuur nonook ka la foti medida kona-ba asaun asédiu seksuál iha públiku no iha fatin edukasionál sira.
"Agora daudaun ami halo hela koordenasaun ho MESSK hodi hala'o programa estratéjia zero toleránsia asédiu seksuál ho objetivu atu kombate asédiu seksuál iha universidade, entaun iha instituisaun 19 mak implementa polítika ida-ne'e," nia dehan, iha PN, Sesta (14/11).
