Sexta, 17 Setembru 2021 | Login
Estudante sira husi Munisipiu Lautem simu apoiu husi Grupu Tane Malu. Estudante sira husi Munisipiu Lautem simu apoiu husi Grupu Tane Malu.

PN Aprova Ona OR Jeneralidade Apoia Estudante Sira Iha Kos Featured

DILI: Parlamentu Nasionál, tersa horsehik (20/4) aprova ona proposta Orsamentu Retifikativu (OR) ba estudante sira ne’ebé hela iha kos Dili, relasiona ho pandemia surtu Covid-19.

Orsamentu ba estudante sira ne’e, inklina ona iha verba orsamentu apoia sósiu-ekonómika tokon $81,7.

Parlamentu Nasionál aprova orsamentu retifikativu hamutuk total tokon $223, 8 liuhusi alterasaun Orsamentu Jerál Estadu (OJE) 2021 iha jeneralidade.

Proposta lei ba alterasaun dahuluk ba Lei Orsamentu Jerál Estadu ba tinan 2021 ne’e aprovadu iha jeneralidade ho votu afavór 44, abstensaun 21 no votu kontra zero (0).

“Alterasaun ne’e atu finansia konjuntu ida husi medida prinsipál neen intervensaun nian ne’ebé Governu prepara ona, maka hanesan, apoiu ba empregu, moratória kréditu nian, apoiu ba estudante sira, seguransa aihan, apoiu ba profisionál liña frente nian, no prevensaun no mitigasaun COVID-19 nian,”dehan Ministru Presidensia Konsellu Ministrus, Fidelis Magalhães, iha nia komunikadu.

Molok ne'e, Ministru Fidelis mos hatete katak, iha posibilidade Governu apoia estudante sira ne’ebé husi Munisipiu mai eskola iha Dili no hetan defikulidade aihan, selu kos no selu propinas, impaktu husi implementasaun Konfinamentu Obrigatóriu no Serka Sanitária iha Dili.  

Husi relatóriu no paresér Komisaun C, katak totál orsamentu retifikativu hamutuk tokon $223,8 ne’ebé realokasaun verba husi Fundu Infraestrutura ho valór tokon $62, realokasaun husi verba dotasaun todo Governu ho montante tokon $26,5 no integrasaun saldu jerénsia ne’ebé la inskritu (não inscritos) iha OJE 2021 ho montante tokon $ 135,3.

Montante orsamentu tokon $223,8 koloka ba kombate no halo prevensaun pandemia Covid-19 ho valór tokon $51,2, medida apoia sósiu-ekonómika tokon $81,7, finalizasaun pagamentu sesta Bázika tokon $31, atribuisaun suplementu remuneratóriu ba traballadór liña frente tokon $51,9 no dotasaun kontinjénsia ba fundu COVID-19 tokon $8.

Parlamentu Nasonál sei kontinua halo deskusaun ba orsamentu espesialidade, hahú kuarta ohin 21 too 27 fulan-Abril 2021.

 

Jornalista: Satrunina da Costa

Editor: Jose Sarito Amaral

Read 577 times Last modified on Kuarta, 21 Abril 2021 08:49
Rate this item
(0 votes)