Prezidente Parlamentu Nasionál, Aniceto Longuinhos Guterres Lopes, husu ba komisaun F atu aviza hela ba governu, toma atensaun ba moras dengue iha rai laran.

"Tanba iha Singapura agora komesa darurat ba moras Dengue, ne'e ema nia sistema saúde ne'ebé di'ak mós sira iha ne'ebá darurat ona, tanba ema moras Dengue nia númeru aumenta barak, see ita nian mak komesa aumenta fali hanesan uluk ne'e problema," dehan nia, iha Parlamentu Nasionál, horisehik.

Tanba ne'e, Prezidente Parlamentu Nasionál, Aniceto Guterres husu governu tenke hatene antisipa situasaun ne'e atu labele akontese hanesan tinan kotuk.

Iha fatin hanesan, Prezidente Bankada Frente Mudansa, Isabel Maria Barreto Freitas Ximenes, husu ba ministra saúde haree fó atensaun ba moras dengue.

"Última semana-rua ka tolu sa'e beibeik tanba udan mós komesa tuun, depois halo bee nalihun iha fatin barak hodi kria susuk," dehan nia.

Nia haktuir, maibé haree fumigasaun mós lala'o fali ona tanba husu ba ministériu saúde toma atensaun.

"Maibé sebele halo ona fumigasaun ba área sira ne'ebé risku tebes ba moras Dengue," Nia husu.

Deputada Bankada CNRT, Maria Fernanda Lay hateten, agora tempu udan presiza tau atensaun husi governu ba moras Dengue.

"Agora oinsá mak ai-moruk atu rega, hein ema mate tán ka hein tán doasaun husi populasaun atu rega, see governu laiha osan hateten ita fó dólar ida-ida atu hodi ba hola reajente ka ai-moruk hodi rega atu evita ita oan mate tán," Nia relata.

Nia haktuir, tanba moras Dengue ne'e halo família balun lakon oan nain rua hotu ida tinan 7 no tinan 12, kasian  mate tanba distinu, maibé mate rua hotu.