PM Taur: Labele Konfundi Demokrasi ho Insultu Malu Featured

By Ekipa INDEPENDENTE Juñu 18, 2020 1711
PM Taur Matan Ruak PM Taur Matan Ruak

DILI:Tuir Primeiru Ministru Taur Matan Ruak, dala-ruma ema konfundi ho demokrásia no insultu malu.

“Ha’u hanoi hanesan hodi bainhira ha’u hatete ba ita-boot sira, ita husik ba ita-nia sidadaun sira diskute, fó opiniaun, so que buat ida ha’u preokupa mak ne’e, dala-ruma ita konfundi demokrásia ho insultu malu,”dehan PM Taur.

Xefe Governu ne’e dehan, balun hanoin dehan insulta ema no trata ema mós demokrásia.

“Respeitu laiha ne’e iha problema iha ita-nia sosiédade, ita-nia aman sira iha foho ne’eba bainhira la respeita malu dala-ruma baku mate malu, ita-nia trata malu, tolok malu, ne’e baiain ona, ne’ebé husik ba sosiédade sira diskute depois ita haree ida ne’e la’o oinsá,” nia dehan.

Entretantu, molok ne’e, Xefe Estadu Maior FALINTIL Forsa Defeza Timor-Leste (F-FDTL) Maijor Jeneral Lere Anan Timur apoiu ideia husi Ministériu Justisa hodi kriminaliza difamasaun, tanba bele sai hanesan edukasaun ida atu labele tolok-malu iha públiku.

Tuir Maijor Jeneral Lere, lei difamasaun sei la hamate liberdade espresaun, maibé hamate de’it liberdade atu ema tolok arbiru de’it.

“Situasaun polítika, demokrásia, ne’ebé hotu-hotu ko’alia, kona-ba lei kriminaliza difamasaun balun kontra ho buat sira ne’e. Lei kriminaliza difamasaun ne’e signifika katak la bandu ka hamate liberdade espresaun maibé hatame liberdade ema tolok arbiru de’it, ne’e mak hanoin katak tenke kumpre,” dehan Lere hafoin enkontru semanál ho Preizdente Repúblika Francisco Guterres Lu Olo iha Palasiu Prezidensiál Bairu-Pite, Kuarta (17/06).

Tuir Lere, presiza duni atu limite ema hodi hasai lia-fuan at iha públiku tanba durante ne’e ho dezenvolvimentu media komunikasaun, ema balun hahú mós la respeitu ema seluk ninia direitu.

“Kriminaliza ne’e ha’u hanoin katak la todan ida, kriminaliza (di’ak liu) duke ita oho malu,” dehan Lere.

Lere afirma, kriminaliza difamasaun sai nu’udar forma edukasaun ida ba Timor-oan, tan ne’e labele hanoin katak atu limite liberdade espresaun.

Tuir Maijor Jeneral ne’e, maske TL moris iha demokrasia nia laran, maibé demokrasia mós iha ninia limite no labele ultrapasa.

“Se la kriminaliza ha’u bele dehan ha’u mós ema, ha’u mós iha familia, se la kriminaliza halo oinsá, entaun bele ha’u rasik mak halo justisa ho ha’u-nia liman rasik.”

Nu’udar lider ne’ebé iha mós esperensia ema tolok iha media sosial, Lere dehan, presiza duni atu iha lei ida hodi limite liberdade atu tolok ema iha públiku.

“Ema ne’ebé (ema) la tolok sira ne’e sira dehan di’ak hela, maibé ami ne’ebé ema tolok ami ne’e ami sente moralmente afetadu, la’os ha’u de’it (maibé) feen, oan, hotu-hotu, familia tomak, hotu-hotu, sira dehan ‘ha’u nu’udar aman, nu’udar oan, nu’udar maun, nu’udar alin, nu’udar feen, ha’u nunka tolok, nusa maka ema seluk bele tolok’, ne’ebé ita labele halimar ida ne’e,” Maijor Jeneral Lere afirma.

Rate this item
(0 votes)

Independente Digital TV