PM Taur: La Nesesidade Fó Subsídiu ba Estudante iha Rai Laran

By Aquino Gomes Agostu 13, 2020 2347
PM Taur Matan Ruak. PM Taur Matan Ruak.

DILI: Maske estudante sira ne’ebé durante ne’e hala’o estudu iha Timor-Leste ezije ba governu atu fó mós subsidiu ba sira, maibé Primeiru Ministru Taur Matan Ruak hatete katak laiha nesesidade atu estudante sira ne’e simu subsidiu.

PM Taur deklara kestaun ne’e iha Parlamentu Nasionál bainhira deputadu bankada PUDD husu kona-ba kestaun ne’ebé estudante sira iha rai laran ezije.

Xefe Bankada PUDD, António de Sá Benevides husu ba governu atu klarifika ba estudante sira iha rai laran ne’ebé durante ne’e mós ezije atu hetan subsidiu.

“Ha’u fiar katak subsídiu ba estudante sira iha estranjeiru mós governu fasilita ona, ida ne’e ha’u apresia no apoia tebes, maibé oinsá bele mós fó klarifikasaun ba  ita-nia estudante Timor-oan sira ne’ebé mak eskola iha Timor, liu-liu ba sira ne’ebé estuda iha universidade privada sira. Bele ka la’e governu fó netik subsídiu ruma,” dehan Antonio iha PN, Tersa (11/08).

Hatan ba kestaun ne’e, Primeiru Ministru Taur Matan Ruak hatete, laiha nesesidade atu fó subsidiu ba estudante sira iha rai laran.

“Ita halo ideia ne’ebé governu fó subsidiu ba estudante sira iha rai li’ur, tanba atu impede sira atu labele mai iha rai laran par lori moras mai ita, ida ne’e mak ita fó (subsídiu), tanba ne’e ami mós la nesesidade atu fó ba ita-nia estudante sira iha rai laran ne’e,” dehan PM Taur.

Iha fatin hanesan, Xefe Bankada Partidu Demokratiku, António da Concecão “Kalohan” hatete, impaktu Covid lori duni konsikuensia ekonómika ba mós estudante sira iha rai laran.

“Eskolla ida, hodi estuda iha rai laran reflete mós kondisaun ekonomika familia sira ni’an. Estudantes barak mak mai husi munisipiu no hela iha Dili iha fatin sira ne’ebé sira aluga,” dehan nia

Nia dehan, impaktu covid no empase polítika ne’ebé Timor-Leste hasoru halakon ona oportunidade ba ema barak.

Ho kondisaun ne’e difikulta mós inan-aman sira atu hetan rendimentu hodi bele hetan osan atu fó ba nia oan sira hodi bele selu sira-nia eskola no bele moris iha sidade Dili.

“Halo justisa ba ita-nia sidadaun sira hotu, karik oportunu governu liu husi Ministériu Ensimu Superiór hodi halo medidas polítikas hodi liberta husi estudante sira husi propinas no mós fó subsídiu uitoan atu sira bele hala’o nafatin sira-nia estudu hodi prepara an ba futuru Timor-Leste ninian,” nia husu.

Rate this item
(0 votes)

Independente Digital TV