Apelu ne’e hato’o hafoin serimónia asinatura kontratu inter-administrativu entre Komisaun Anti Korrupsaun (KAK) no Ministériu Administrasaun Estatal (MAE), ne’ebé realiza iha Hotel JL World, Área Branca, Díli, Tersa (26/05).
Kontratu ne’e asina husi Ministru Administrasaun Estatál, Tomás do Rosário Cabral, no Komisáriu KAK, Rui Pereira dos Santos, ho sasin husi PM Xanana no prezensa autoridade munisipál 13, inklui Atauro.
Objetivu husi kontratu ida ne’e mak atu reforsa prevensaun no kombate korupsaun liu husi servisu Balkaun Úniku no Portal Munisipál iha teritoriu tomak Timor-Leste, atu komunidade sira ne’ebé hela dook husi kapitál Díli bele asesu informasaun no hato’o denúnsia diretamente ba KAK.
Iha ninian intervensaun, PM Xanana dehan katak osan Estadu mak osan povu nian, ne’ebé hetan liu husi sakrifísiu naruk povu Timor-Leste nian durante luta ba ukun rasik-an. Tanba ne’e, rekursu Estadu tenke jere ho responsabilidade no transparánsia.
“Asinatura entre MAE ho KAK importante tebes. Importante tanba osan povu nian. Povu nia mate, terus no ruin mak sosa ida ne’e. Fundu Petroliu la’os mosu de’it. Povu mak sosa,” dehan PM Xanana.
Tuir dokumentu kontratu ne’e, Portal Munisipál sei disponibiliza informasaun kona-ba mekanizmu legál prevensaun no kombate korupsaun, obrigasaun integridade ba titular kargu públiku no prinsípiu boa governasaun.
Aleinde ne’e, sidadaun sira mós bele utiliza formuláriu eletróniku atu hato’o denúnsia korrupsaun ba KAK ho garantia konfidensialidade no anonimatu bainhira presiza.
Iha parte seluk, Balkaun Úniku sei fó atendimentu direta kona-ba prevensaun korupsaun, transparénsia no direitu sidadaun sira iha relasaun ho administrasaun públika.
Funsionáriu sira ne’ebé destaka ba servisu refere mós sei simu no enkamiña denúnsia sira ba KAK tuir prosedimentu ofisiál.
Kontratu inter-administrativu ne’e mós define katak KAK sei prepara kontéudu informasaun, formuláriu no formasaun téknika ba funsionáriu Balkaun Úniku. Enkuantu MAE sei responsabiliza ba infraestrutura téknika, hardware no manutensaun operasionál ba Portal Munisipál no Balkaun Úniku.
Serimónia asinatura kontratu ne’e realiza molok hahú Reuniaun Konsellu Koordenasaun Teritorial (CCT) kona-ba implementasaun Konsolidasaun Planu Asaun Anual (PAA) no Planu Prioridade (PP) 2027.
