Antes ne’e Xefe Governu deklara ona atu lakohi fila ba Uma Fukun PN, tanba deputadu opozisaun balun hatudu etiketa di'ak durante diskusaun. Ne’e duni, atu delega membru governu balun hodi reprezenta nia iha diskusaun.

Maibé, ikus-ikus ne’e PM Alkatiri muda ona nia pozisaun. Hafoin fulan rua Governu prepara hotu dadus tuir pedidu deputadu sira nian, Xefe Governu ne’e iha vontade atu ba aprezenta hikas.

Ministru Prezidensiál Konsellu Ministru, Adriano do Nascimento hateten, tuir lei, Primeiru Ministru mak lori programa ba deputadu sira iha Parlamentu hodi hataan ba sira nia ezijénsia.

Nia reforsa, tuir Konstituisaun, Primeiru Ministru mak aprezenta Programa VII Governu ba deputadu sira, kestaun kona-ba nomeia membru Governu balun atu aprezenta, ne’e depende ba Xefe Governu rasik mak foti desizaun.

Prezidente Parlamentu Nasionál sei konvoka enkontru ho lider bankada sira atu diskute kona-ba oinsá aprezenta programa Governu nian iha Parlamentu Nasionál.

Tanba programa VII Governu daudaun remata ona, agora iha hela jurista sira nia liman atu halo revizaun karik dokumentu balun seidauk kompletu.

“Ami halo hotu ona base line, ne’ebé deputadu sira ezije ne’e ami halibur hakerek hotu ona”, dehan Adriano iha Uma Fukun PN, horisehik.

Nune’e, nia dehan, programa ne’e rasik Governu konsidera anotasaun, tanba sei iha justifikasaun. Governu sei responde deputadu sira nia preokupasaun ne’ebé ne’e ezije atu aprezenta lalais programa ne’e.

Programa VII Governu ne’e rasik remata ona, hein aprezenta iha Konsellu Ministru no Primeiru Ministru asina hodi lori mai deputadu sira iha Parlamentu Nasionál atu aprezenta.