Tuir informasaun, peskadór na'in neen ne'e mout bainhira hala'o atividade peska bainhira udan boot tuun.

Komandante PNTL Munisipiu Ainaru, Superintendente Xefe Justino Meneses hatete, peskadór sira ho idaidak nia bero tama tasi, maibé to'o tasi klaran laloran tasi derepente boot.

"Ema na'in 6 mout, labele salva aan, maibé ida mesak salva an, moris," dehan nia via telefone, Tersa (14/04).

Hafoin akontesimentu ne'e, nia dehan, polisia hamutuk ho komunidade no familia sira buka tuir, maibé foin konsege hetan na'in ida ho kondisaun mate.

“Foin mak ita hetan ona joven ida naran Rosalino Freitas idade tinan 30, maibé vitima na'in lima seluk to'o agora seidauk hetan," dehan nia.

Vitima ne'ebé hetan, nia dehan, daudauk ne'e lori ona ba familia hodi haloot.

Enkuantu polisia no familia sira sei kontinua buka tuir vitima na'in lima seluk ne'ebé to'o ohin seidauk hetan.

Vitima na'in lima ne'ebé seidauk hetan mak; Helder da Silva, Mariano das Neves, Abrio Lemos Adão, Rodolfo Trindade, no Costantino da Costa.

“Sira na'in lima ne’e nia idade seidauk klarfika loloos, tanbá husu ba familia sira mós la hetene sira nia idade," dehan nia.