PD Hato’o Karta Koligasaun ba CNRT, Plataforma sei ba Opozisaun Featured

By Aquino Gomes Maiu 31, 2023 333
Partidu Demokratiku hato’o karta koligasaun ba Partidu Congresso Reconstrução Nasional de Timor Leste hodi bele konsidera bainhira hakat ba formasaun governu foun. Foto:INDEPENDENTE. Partidu Demokratiku hato’o karta koligasaun ba Partidu Congresso Reconstrução Nasional de Timor Leste hodi bele konsidera bainhira hakat ba formasaun governu foun. Foto:INDEPENDENTE.

DILI: Partidu Demokratiku hato’o karta koligasaun ba Partidu Congresso Reconstrução Nasional de Timor Leste hodi bele konsidera bainhira hakat ba formasaun governu foun.

Ho karta koligasaun refere, iha posibilidade boot atu CNRT ho PD ukun hamutuk hikas no plataforma ne’ebé kompostu husi Fretilin, Khunto no PLP sei ba opozisaun.

Iha Tersa (30/05), horseik, Sekretariu Jeral PD, Antonio da Conceição ‘Kalohan’ hamutuk ho estrutura PD, hakat ba sede CNRT iha Bairo dos Grilhos hodi hasoru-malu ho Sekretariu Jeral CNRT, Francisco Kalbuadi Lay.

Iha sorumutu refere, Sekjer PD aprezenta karta proposta koligasaun ba Sekjer CNRT.

Kaloha hatete, desizaun ne’e PD foti hafoin halo reflesaun iha loron hirak liu ba no hafoin akompaña konferensia imprensa husi partidu CNRT, iha 30 Maiu dader.

“….Partidu Demokrátiku hamutuk ho Prezidente Assanami, ho Konsellu Superior Partidu Demokrátiku nian deside atu haruka ha'u, hanesan mai atu hato'o saudasoes ba maun boot Xanana Gusmão no mós estrutura tomak ba konfiansa ne'ebé mós mak povu mak deside liu husi partidu CNRT," dehan Kalohan hafoin sorumutu.

Iha sorumutu ne’e, Kalohan hatutan, PD mós aprenzenta ninia protidaun atu hamutuk ho CNRT iha formasaun governu foun.

"Horseik hanoin dehan katak ami-nia opsaun ne'ebé mak ami hanoin atu hakarak hato'o ba CNRT mak ami mai, hanoin hanesan posivel aliadus ne'ebé mak Partidu CNRT bele konsidera bainhira ita hakarak bele avansa ba formasaun governu nian."

"Ida ne'e hanesan pasu primeiru ne'ebé mak ami fó, ami mai hodi hato'o hela de'it intensaun ida ne'e, atu husu CNRT hanoin se karik mós CNRT bele konsidera espiritu kotuk ne'ebé mak ita la'o hamutuk iha tinan 10 ba kotuk nune'e mós saida mak ita hanoin hamutuk kuaze hanesan, iha kampaña ne'ebé mak CNRT ho PD rasik halo," dehan nia.

Nia hatutan, nia parte lori mós karta ba CNRT hodi aprezenta PD nia saudasaun, espresa no sentimentu atu karik iha posibilidade bele lao hamutuk ba formasaun governu.

Iha fatin hanesan, Sekretáriu Jerál CNRT, Francisco Kalbuadi Lay agradese ba PD ninia intensaun.

"Formalmente depois Tribunál anúnsia rezultadu ofisialmente, karik Xefe Estadu sei  bolu, konvida partidu mais votadu, klaru ke ha’u sei hato'o ba maun boot Xanana, depois ita sei marka enkontru ida formál, maun boot ho estrutura, depois sei hato'o ba Prezidente Assanami bele tuur hamutuk, haree posibilidade hanusa mak partidu rua hamutuk serví di'ak liu ba povu," nia dehan.

Rate this item
(0 votes)

Independente Digital TV