Prezidente Partidu Demokrátiku, Mariano Assanami Sabino halo deklarasaun apoiu kualker Governu ne’ebé mosu hodi konstrui estabalidade nasaun, atu aseleira dezenvolvimentu.

“Ami prontu atu apoiu ba kualker Governu saida de’it mak atu mai, ami apoiu husu ba ita hotu par ita mantein respeitu ba lei no konstitusaun  no repeitu nafatin ba prinsipiu  konstrusaun estadu direitu demokratiku,”dehan Assanami, liu husi konferensia impresa, iha Sede PD Kolmera, Kinta (07/05).

Nia reafirma, foin dadauk Partidu Demokrátiku deside liu husi konferensia foti desizaun ida hodi hola parte iha koligasaun foun, maibé agora dadauk nia prosesu ne’e la’o.

“Ami halo konferensia impresa ida ne’e katak Governu ne’ebé mak ba oin, Partidu Demokrátiku ba Estadu, Partidu Demokrátiku fó apoiu ba estabilidade ne’ebé mak di’ak, ba rai ida ne’e Partidu Demokrátiku hakruk,”dehan nia.

Assanami hatete, Partidu Demokrátiku ba nasaun ida, mantein nia pozisaun liu husi asaun sempre afavor ba programa no orsamentu ba kualker Governu, inlui ba VIII Governu Konstitusionál.

“Ho hanoin katak situasaun ba povu ne’ebé mak hamlaha no ekonomia ne’ebé iha tempu impase politiku, laiha dalan atu Partidu Demokrátiku atu halo opozisaun ba situasaun hanesan ne’e,”nia hatutan.

Ho situasaun impase ne’e, Partidu Demokrátiku hakarak fó kontribuisaun no ideia hodi aselera dezenvolvimentu ba nasaun ida ne’e.