Enkuantu, Padre José Antonia hakotu iss, iha sala Unidade Kuidadu Intensivu (ICU), iha Óspital Nasional Guido Valadares, loron 28 fulan-Dezembru 2022, tuku 2:00 madrugada, oras Timor-Leste.
Administrador Parokia Katedral, Leandor Maria Alves, hatete, Padre José António, hahú baixa iha HNGV iha loron 23 Dezembru 2022, tanba sofre moras diabetes no tensaun no mós la han-hemu iha semana ida nia laran ona.
“Senti triste tebes ba monsenhor nia mate, nia ema ida ne’ebé dedika nia-an tomak ba igreja no ba evanjelizasaun,”dehan nia iha Igreja Katedral, Vila-Verde, Dili, kuarta ne’e (28/12).
Nia hatutan, Padre José Antonio remata nia peregrinasaun iha mundu ho idade 82, nuudar Padre Pároku iha Paroquia Nossa Senhora Imaculada da Conçeição Katedra Dili.
Iha sorin seluk, Sarani Judit Monis, hatete, hanesan sarani nia senti triste tanba lakon ona bibi atan diak ida hanesan Padre José Antonio, ne’ebé hamahan aan nuudar Padre Parokia Nossa Senhora Imaculada da Conçeição durante tinan barak.
“Triste tebes, maibé laiha buat ida dalan mak nune’e ona, nuudar sarani ami tenki simu realidade ne’e,”nia dehan.
Entretantu, Padre José António oan husi aman António da Costa no inan Etelvina da Costa no oan dahitu husi maun alin nain sanolu-resin-ida.
Padre moris iha Fatu Belak, aldeia Fatuk Mutin, Sucu FatuKahi, postu administrativu Fatuberliu Munisipiu Manufahi iha loron 4 Maio 1940.
Tuir informasaun Padre nia isin mate sei rai iha Igreja Nossa Senhora Imaculada da Conçeição Katedral, no iha loron sesta (30/12), tuku 09:00 dader sei halo missa matebian, hafoin iha tuku 12:00 otl, sei ba halo’ot Padre nia isin mate iha semiteriu Ailok Laran, Dili.
