Padre Justinianu: Joven Sira Tenki Dignifika Nafatin Sakrifisiu Éroi Sira Nian Featured

By Ivonia Varela Novembru 27, 2023 2222
Padre Parokia Santa Terezinha Kelikai, Justiniano de Sousa selebra misa agradesementu ba selebrasaun loron Proklamasaun Independensia ba dala-48, iha Igreja Santa Terezinha, Kelikai, (27/11/23). Foto:Media Gab. SEKoop. Padre Parokia Santa Terezinha Kelikai, Justiniano de Sousa selebra misa agradesementu ba selebrasaun loron Proklamasaun Independensia ba dala-48, iha Igreja Santa Terezinha, Kelikai, (27/11/23). Foto:Media Gab. SEKoop.

BAUKAU: Padre Parokia Santa Terezinha Kelikai, Justiniano de Sousa iha ninia ómilia iha misa agradesementu ba selebrasaun loron Proklamasaun Independensia ba dala-48 hatete, jovetude sira tenki dignifika nafatin sakrifisiu éroi sira nia luta ba Timor-Leste nia ukun rasik aan.

Nune’e mós Padre Parokia ne’e husu ba joven sira kria paz no dame iha bairo laran hodi dudu dezenvolvimentu nasionál ba oin.

“Selebrasaun ba aniversariu loron Proklamasaun Indepedensia ne’e atu fó hanoin ba ema hotu atu fó agradese no tane aas nafatin luta na’in sira ne’ebé luta ba rai ida ne’e, tanba hakarak de’it ukun rasik aan,  sira fó an ba mate,”dehan Padre Justiniano, iha Igreja Santa Terezinha Kekilai, segunda ne’e (27/11).

Padre Parokia afirma, atu hetan Independensia ida ne’e la’os de’it luta na’in sira nia esforsu maibé ho kbiit Maromak nian haforsa sira hodi luta ba rai ida ne’e to’o hetan Independensia.

“Sei la iha promesa ida atu luta hodi fó an ba rai ida ne’e, maibé ita nia luta la mesak sira luta ho Maromak,” Tenik Padre Parokia.

 Iha Fatin hanesan, Sekretáriu Estadu Kooperativa Arsénio Pereira da Silva hatete, atu hetan Independensia, luta na’in sira liu husi sakrifisiu ne’ebé boot, la’os ema ida de’it, maibé povu Timor-Leste sakrifika an no balun fó an ba mate, maibé to’o iha tinan 1999 sira konsege duni inimigu boot ne’ebé iha TL.

“Inimigu sira durante tinan 24 sira mai invade ita, oho no estraga ita, tanba ita lakohi ida ne’e, ita hakarak mak luta ba ukun rasik an,” dehan nia.

Governante ne’e afirma,  ho prezensa membru governu nian, iha Postu Administrativu Kelikai, atu enkoraza nafatin povu tomak liliu povu Kelikai oinsa atu moris nafatin nia estabilidade nia laran no oinsa atu dezenvolve rai ne’e.

Entretantu, iha misa agradesementu ba selebrasaun loron Proklamasaun Independensia ba-48 hetan partisipasaun masimu husi funsionari SEKoop, Autoriedade Lokal, Estudante sira no mós sarani sira.

Enkuantu, hafoin misa remata, Sekretáriu Estadu Kooperativa hamutuk ho Padre Parokia Santa Terezinha Kelikai, funsionariu, autoridade lokal, estudante sira no mós komunidade Postu Kelikai ba karii aifunan iha semiteriu Masakre Lakudala Suku Lakoliu, Postu Administrativu Kelekai, Munispiu Baukau.

Rate this item
(0 votes)

Independente Digital TV