Lourenço de Oliveira, Sasin Rekoperadu Husi Moras Covid-19 Featured

By Saturnina da Costa Maiu 15, 2021 1132
Lourenço de Oliveira antes baixa iha izolamentu Vera Cruz. Lourenço de Oliveira antes baixa iha izolamentu Vera Cruz.

DILI:Pasiente Covid-19 ne’ebé rekopera ona husi Sala Izolamentu Vera Crus fó sasin katak, moras ne’e eziste duni iha nasaun Timor-Leste.

Liu husi konferensia imprensa, Lourenço de Oliveira hatete, bainhira nia senti isin manas makas nia kontaktu kedan ba SIJK hodi halo teste Swab ba nia ho familia.

“Primeiru liu ha’u lahatene buat ne’e kona tiha ha’u antes iha loron 28-29, ha’u ba vasina depois loron 6 nia laran mak ha’u foin senti isin manas, mear no ha’u dehan ne’e buat ruma la los. Nune’e ha’u resolve hodi kontaktu ba SIJK  atu mai halo teste Swab hodi hatene positivu ka negative, maibé ekipa sira mai halo teste Swab ami familia hetan positivu inklui ha’u nia beioan sira, ami hotu iha sintomas,”dehan nia iha nia rezidensia Dili, ne'ebe rttl, ep fo sai, sesta ohin (14/05).

Nune’e, liu tiha loron rua nia senti labele ona no kontaktu kedas ba ekipa sira ho ambulansia mai foti nia ho nia-oan mane boot ba izolamentu iha loron 4 fulan-Abril, enkuantu familia sira izola-an iha uma deit.

“Iha loron rua nia laran ha’u senti ba labele ona no kontaktu kedas ba ambulansia mai foti ha’u lori ba izolamentu tasi tolu, doutor sira halo observasaun iha ne’ebá durante oras tolu to’o oras haat, hafoin deside lori fali mai iha vera crus,”tenik nia.

Nia hato’o nia esperensia iha Vera Crus, doutor sira halo observasaun durante loron haat nia laran ha’u tau soru no han mós la diak.

Tanba ne’e nia senti duni moras ne’e eziste no husu ba ema hotu atu kuidadu an tuir regras ne’ebé iha.

“Ha’u uluk ulun to’os lafiar katak Covid-19 ne’e iha, maibé to’o ikus kona ha’u no ha’u rekoñese katak moras ne’e iha duni, nune’e ha’u husu ba públiku liu-liu sira ne’ebé lafiar katak Covid-19 ne’e eziste, husu atu imi tenki fiar, tanba ha’u rasik moras ne’e kona, ha’u fó deit sasin ba imi hotu katak moras ne’e eziste”, nia haktuir.

Ba maluk sira ne’ebé gosta tuda ambulansia, kontra ekipa saúde no doutor sira ne’e, ida ne’e halo sala bo’ot.

“Tanba ita ba iha ne’ebá sira deit mak bele salva ita, familia sira dook husi ita. Ha’u husu ba públiku labele fiar katak ema hatete covid-19 ne’e la eziste maibé moras ne’e iha duni”,nia informa.

Nia agradese mós ba ekipa sira iha sentru saúde vera crus ne’ebé halo tratamentu ba sira diak tebes hodi kosege rekupera.

Nia haktuir katak, iha izolamentu profesional saúde sira halo tratamentu ba sira ho diak tebes, oras to’o fó aimoruk ba pasiente tuir moras ne’ebé iha, sona no fó hahan, no hasai mós raisis bainhira deteta pulmaun foer sira fó aimoruk hodi hamos.

Lourenço halo tratamentu iha Izolamentu Vera Cruz iha loron 4 fulan-Maio no grasa na’in maromak nian loron horseik (13/05) nia rekupera hafoin rezultadu teste hatudu negativu.

Rate this item
(0 votes)
Last modified on Sábadu, 15 Maiu 2021 09:21

Independente Digital TV