Prezidente Komisaun F, Noe da Silva Ximenes hateten, komisaun sei la halo fiskalizasaun ba asuntu ai-moruk, maibé bolu SAMES halo klarifikasaun.
Nia hateten, informasaun ne'ebé SAMES fó ba Komisaun F PN, ai-moruk ba moras sira ne'ebé ladún iha ne'e mak ninia ai-moruk hotu.
"Maibé ai-moruk diariamente hodi utiliza kada tempu ne'e iha, maibé ai-moruk sira-ne'ebé mak espesifikamente ba moras ne'ebé jarang ne'e mak laiha duni," dehan nia, via telefone, horisehik.
Noe hateten, Komisaun F planu hela semana oin foin bolu SAMES mai atu husu konfirmasaun ba ai-moruk sira.
"Tanba fiskalizasaun la'ós atu ba to'o iha terrenu, maibé bele bolu diretór SAMES bele halo konfirmasaun ai-moruk ne'ebé falta," nia relata.
Durante iha plenária deputadu sira levanta hela de'it falta ai-moruk iha ospitál sira, entaun komisaun bolu de'it diretór SAMES hodi konfirma ai-moruk sira iha armazein.
"Tanba sira mak sosa ai-moruk, tanba saida mak ai-moruk ne'e bele hotu, keta moras sira ne'ebé afeta barak liu ka hanusa," nia informa.
Nia fundamenta, maibé tinan ida-ne'e sira sosa ai-moruk, maibé ladún barak no ai-moruk ne'e tama hotu ona.
Molok ne'e, Deputada Partidu KHUNTO, Irene Gonzaga Sarmento, kestiona postu saúde Bariki, Munisípiu Manatutu falta ai-moruk.
"Ha'u foin husi munisípiu Manatutu, Postu Administrativu Bariki, Ha'u hetan informasaun husi komunidade sira-ne'ebá, sira hateten katak ai-moruk daudauk iha Postu Saúde agora stock ai-moruk laiha ona," dehan nia, iha Parlamentu Nasionál, segunda (13/06).
Tuir nia, ai-moruk hanesan Paracetamol ne'ebé sira baibain konsulta hanesan kabun moras, isin manas, maibé ai-moruk sira laiha hotu ona.
"Sira so ba konsulta klínika privadu sira mak foin hetan ai-moruk sira ne'e. Hanoin ida ne'e mak komunidade hato'o mai ha'u atu hato'o ba Ministériu Saúde atu haree took asuntu ida ne'e ho sériu," Nia relata.
Nia hateten, tanba agora komesa udan entaun ema sira komesa moras barak hanesan isin manas,kabun moras, muta.
"Tanba ne'e husu Ministériu relevante atu haree ida ne'e, se bele koloka ai-moruk ba iha fatin ospitál sira-ne'ebé presiza, agora sira presiza tebes ai-moruk," Nia informa.
Iha fatin hanesan, Deputada Bankada Fretilín, Helena Martins Belo hateten, falta ai-moruk iha ospitál ne'e loos.
"Tanba semana kotuk prezensa Ministra Saúde ne'ebé mai komisaun F, ami fó hatene ona no Ministra rekoñese katak SAMES mak haluha tiha sosa ai-moruk orsamentu 2021 nian," nia informa.
Nia informa,tanba ne'e komisaun bele konvida Diretór SAMES mai halo justifikasaun, tanba sá mak iha orsamentu, maibé nia haluha sosa ai-moruk.
"Maibé ida kona-ba ai-moruk Paracetamol, Ministra dehan, sufisiente maibé dala-ruma pedidu mak atraza karik," nia relata.
Prezidente Bankada UDT, Francisco David Xavier Carlos hateten, Ministra Saúde labele fó sala ba SAMES kuandu falta ai-moruk iha ospitál sira.
"Tanba nia mak lidera no nia mak tenke halo jestaun di'ak, halo monitorizasaun ba fatin sira ne'ebé ké difisil tebes atu arranja ai-moruk,"dehan nia.
Nia hateten, maibé di'ak liu Parlamentu Nasionál fó xamada ba Ministra Saúde no Diretór SAMES hodi mai halo esplikasaun ba preokupasaun sira ne'ebé Deputadu sira levanta kona-ba falta ai-moruk iha Sentru saúde, Postu Saúde no HNGV.
