Objetivu husi Fundasaun LAHER atu atinji kapitál umanu hodi promove no dezenvolve agrikultura kafé atu garantia kualidade ba oin .

Iha diskursu, Prezidente LAHER, Óscar Lima, sente priviléjiu ba konfiansa maibé ne’e la'ós fasil. Nune’e, sei servisu hamutuk ho estrutura ne'ebé iha bele korresponde ba situasaun sira hodi fó hanoin kona-ba LAHER.

Maski nune’e, sei la lori partidu polítiku tama iha laran atu fahe malu. Importante maka ba dezenvolvimentu rekursu umanu no hadi'a kualidade kafé Ermera.

“Ita Ermera-oan ha’u haree balun matan la moos ba malun tanba partidu polítika. Nune’e, hahú husi ohin ba oin labele hanoin partidu polítiku. Buat hotu tau iha fatin preokupasaun mak oinsá atu tau importánsia ba dezenvolvimentu Ermera nian”, dehan Óscar, iha ETCI, Gleno, Sábadu (14/3).

Nia dehan, hanesan Ermera-oan envolve-aan iha polítika ne’e normál, tanba hanesan sidadaun ida-idak nian iha direitu, maibé la’ós tanba polítika Ermera-oan fahe malu.

Nia dehan, tempu agora Ermera-oan tenke esplora intelektualidade ne'ebé iha hodi fo liman ba malu atu tau forsa hamutuk, importante mak fahe partidu polítika tau iha nia fatin.

Tanba vizaun Fundasaun LAHER nian oinsá atu kontribui no hasae kualidade umana moris sosiál ekonomia ne'ebé aas iha Ermera no Timor laran tomak.

Misaun mak liuhusi hasae edukasaun ba feto no mane husi komportamentu téknika individuál organizasionál atu transforma sosiedade ida nia moris prinsipalmente setór agrikultura kafé iha Ermera.

Óscar realsa, haree ba kondisaun kafé Ermera tinan-tinan tuun ba beibeik, nune'e husu intelektualidade Ermera-oan sira atu haree kestaun atu tau atensaun tanba daudaun rendimentu husi kafé hatama reseita ba kofre Estadu sa'e ona ba terseiru lugar kompara ho tinan hirak liubá.

"Ermera-oan presiza trata halo di'ak tanba kafé hanesan ikon importante hamorin Ermera nian naran ba mundu", tenik Óscar.

Nia reforsa, iha Edukasaun nian uluk harii institutu (ETICA) agora transfere ba ETCI, ne'ebé iha kooperasaun ho nasaun barak hanesan Indonézia, Austrália no Portugál.

Daudaun ETCI hahú eziste iha tinan 200, maibé konsege produs ona estudante 725 no daudaun ne'e balun kontinua ona ba mestradu iha nasaun seluk no mós hetan ona rai ektare ualu.

Nune'e, husu ba LAHER oan sira atu fó nafatin kontribuisaun atu nune’e rai ne'ebé bele produs fali buat balun hodi benefisia ida ba ekonomia.

Iha fatin hanesan, Presidente Autoridade Munisípiu Ermera, José Soares, sente orgullu tanba Ermera-oan sira-nia matenek iha ona ETCI Reprezentante Ermera.

Nia dehan, LAHER halibur Ermera-oan, nune'e presiza unidade haluha kór partidu polítiku sira hotu tau interese Ermera mak importante iha hanoin atu hadi'a kualidade edukasaun ida di'ak presiza hadi'a kondisaun infraestrutura no kapasita dosente sira atu garante ba futuru.

Entretantu, iha pose ne’e marka prezensa mós intelektuál no emprezáriu Ermera-oan no Embaixadór Indonézia ba Timor-Leste, Sahat Sitorus, kompañia Timor Globál, Reprezentante Timor Telecom no Estudante Ermera-oan sira.