Sekretáriu Jerál Interina OPMT, Florentina Martins Smith hateten, hanesan organizasaun dahuluk feto Timor ne'ebe FRETILIN harii iha 28 Agustu 1975, hodi tane aas direitu no valor feto nian.
Nia dehan, papel importante OPMT nian iha tempu rezisténsia liu-husi frente armada, frenfe klandestina no frente diplomatika hodi atinje libertasaun nasional ukun-aan.
Maibé hafoin restaura independensia, OPMT re-organiza fali iha tinan 2000 ho mini-konferénsia no halo konferensia nasional iha tinan 2007, 2012, 2016 no ohin tinan 2022 ba dala haat hodi halo revizaun ba ninia mata-dalan.
Nia hateten, atu tuir estatutu OPMT hodi hataan diak liután nu’udar knaar organizasaun massa Partidu Fretilin nian ne’ebé preokupa ho feto hotu-hotu nian. OPMT konsege realiza halibur maluk feto sira liu-husi meiu oioin hodi koordena servisu sira iha nivel nasionál to’o baze.
Nune’e, OPMT konsege halibur delegada husi munisípiu sanolu-resin rua (12) inklui RAEOA hamutuk 395 mai marka prezensa ba konferensia nasional ba dala haat nian.
“OPMT sei kaer prinsípiu no valór ne’ebé sai hanesan mata-dalan no sasukat OPMT nia komprimisu atu kontinua luta hasoru injustisa sosiál, abuzu seksuál no violensia domestika hodi haka’as hasoru influensia husi see de’it ne’ebé prejudika identidade povu maubere nian,” dehan Florentina, iha Salaun Katedrál, Sesta (11/2).
Nia hatutan, OPMT iha ona hanoin no vizaun ba futuru presiza servisu maka’as atu halo kadernizasaun no fó motivasaun ba jerasaun foun sira hodi investe ba sira nia-aan rasik iha área oioin hodi kontribui di’ak liutan dezenvolvimentu nasionál.
Nune’e, OPMTL kontinua buka no dada nafatin maluk feto Fretilin ho ondas ema na’in sanolu-resin-hitu ba leten hodi enkuadra iha atividade polítika sosiál no ekonomika.
Nia haktuir, planu no programa OPMT nu’udar organizasaun massa Fretilin nian sei entegra mós iha planu no programa partidu nian.
Iha fatin hanesan, Sekretáriu Jerál Fretilin, Marí Alkatiri hateten, konferensia ne’e momentu importante tebes hodi diskute kestaun kompleksidade oioin kona-ba feto liuliu direitu feto husi baze to’o nasionál.
“OPMT nu’udar organizasaun karater úniku ne’ebé harii husi partidu Fretilin, nune’e konferensia sira no organizasaun hodi hamriik, serve direitu tomak feto sira nian hanesan, afirma direitu feto hahú husi ba to’o nasionál moris igualidade ho direitu sirkunstansia iha servisu no reponsabilidade,” dehan nia.
Iha fatin hanesan, Sekretária Estadu Igualdade no Inkluzaun (SEII), Maria Jose Fonseca hateten, partisipasaun feto nu’udar save ba prosesu dezenvolvimentu.
Tuir nia, estudu lubuk ida hatudu evidensia katak bainhira nia direitu asegura sosiedade tomak manan, feto manan, labarik Manan, no mane sira mós manan.
Maibé sei laiha progresu iha rai ida ne’e bainhira feto nafatin seidauk tur iha meza kondisaun hanesan ho mane no fatin ho respeitu hodi kontribui ba dezenvolvimentu nian.
Nia hateten, OPMT uluk no agora nia obejtivu hanesan katak promove dezenvolvimentu Timor-Leste nu'udar estadu soberanu no nudar nasaun ida hodi fo hatan ba direitu ema hotu nian liu-husi partisipasaun feto.
Iha Instituisaun la haree ba kor ka Partidu no serteja katak feto hotu-hotu iha kompromisiu hodi kontribui ba dezenvolvimentu iha nivel oi-oin inklui iha nivel dezenvolvimentu estadu, sosiedade no família.
