Diretór Nasional Polítika Igualdade Jenéru iha Sekretária Estadu Igualdade, Abilio Barreto hatete, ezekusaun husi montante orsamentu ne’e, SEI foku ba iha atividade sira hanesan, prevensaun violensia bázeia ba jenéru, abordajem integridade Jenéru no hakbiit feto iha vida politika no ekonomia.
Nune’e, SEI mós foku ba iha programa boot rua no mós sub-programa haat ne’ebé hala’o iha tinan ida ne’e.
“Orsamentu Jerál Estadu 2025, iha faze terseiru trimetre nian to'o iha fulan Outobru, Sekretária Estadu Igualdade ezekuta ona pursentu 69,”dehan nia ba Online INDEPENDENTE iha nia knar fatin, edifisiu SEI, Kaikoli, Dili, Tersa (21/10).
Nia hatutan, Sekretária Estadu Igualdade iha programa boot rua, ne'ebé foka liu ba iha programa sira ne'ebé esensial ba iha instituisaun igualdade nian maka programa igualdade jeneru no inkluzaun sosial.
Diretór Nasionál ne’e esplika, ezekusaun orsamentu tinan ne'e, SEI mós foka ba iha sub-programa hamutuk ha'at (4) maka hanesan, ida, abordajem integridade Jenéru ne'ebé introduz promosaun igualdade jenéru Governu nian ho autoridade munisipiu sira.
Nune'e mós, iha sub-programa da-rua maka foka ba iha prevensaun violensia bázeia ba jenéru ne'ebé bele kontribui ba redusaun violensia bázeia ba jenéru iha Timor-Leste inklui violensia domestika.
Datoluk mak empodera feto iha ekonomia mak ligadu ho osamentu tranferensia publiku ba kategória tolu hanesan fundus rotativa no apoiu ba NGO sira hanesan Alfela, fundasaun Alola no Fokupers no ida seluk, mak fundos ne'ebé SEI apoiu ba iha grupo vulneravel sira ne'ebé senti katak, feto sira iha ninia moris susar tebes atu hetan rendimentu loro-loron.
"Ita iha fundos balun ami preve ba iha sira, oinsa sira bele hadi’a sira nia kondisaun moris loro-loron nian,” tenik Diretór Abilio.
Aleinde ne’e, Diretór Nasional ne’e reforsa, SEI iha mós programa ida mak hakbiit feto iha vida politika ne'ebé foka barak liu oinsa mak atu prepara feto sira ba iha lideransa no oinsa halo jestaun ba iha lideransa nian.
Tanba ne'e, ho sub-programa ha'at (4) ne'e maka kontribui ba iha promosaun Igualdade jenéru no Inkluzaun iha Timor-Leste.
Entretantu, Orsamentu Jerál Estadu tinan 2025 ne’ebé aloka ba iha Sekretária Estadu Igualdade hamutuk milaun $1.835.595.00 hodi aloka ba salariu no vensimentu $919.350, bens no servisu $716.245 no transferensia publika rihun $200.