“Audensia ho Komisaun G la'o diak tebes no ko’alia liu kona ba orsamentu fiskal Ministeriu Edukasaun anu fiskal 2023 ho total orsamentu 122 millões no tinan 2024 ho montante 114 millões", dehan Ministra Dulce de Jesus, iha sala Komisaun G, Parlamentu Nasional (30/11).
Governante ne’e hatutan, Orsamentu Jeral Estadu 2024 sei tau aloka ba asuntu prioridade sira hanesan, infraestrutura eskolar, jestaun eskolar, formasaun profesores, konteudu kurikular no rekursu umanu, ida ne'e mak sei sai nafatin prioridade ne'ebe Ministeriu Edukasaun sei kontinua hala'o.
Verba ne’e aloka tuir kada katergoria sira mak hanesan, salariu vensimentu millaun $89.4, ben servisu millaun $11,4, transferensia publika milaun $9,3 kapital menor milaun $1,8 no capital dezenvolvimentu milaun $5.
“Bainhira halo aprezentasaun ba orsamentu iha Komisaun Revizaun Orsamental, ami aprezenta ami nia proposta no fó tuir ami nia kapasidade implementasaun no tuir nesesidade eskola nian, ne’ebé eskola sira presiza,”nia esplika.
Ho nune’e, iha Orsamentu Jeral Estadu 2024, Governante ne’e garante katak sira sei implementa ho diak.
Iha fatin hanesan Prezidente Komisaun G, Armando dos Santos Lopes hatete, audensia ho Ministra Edukasaun ne’e foku liu ba Orsamentu Jeral Estadu Ministériu Edukasaun nian ba tinan 2024.
"Ohin ami hare orsamentu ne'e menus maibe ami hato'o ba ME katak osan ne'e bele menus ita presiza ezekuta 100%, hanesan reprezenta povu iha uma fukun ida ne'e ami hein rezultadu no ami sei tuir hodi halo fiskalizasaun", dehan Prezidente Komisaun G.
