Ohin Pose ba MG Na’in 8

By Domingos Gomes Maiu 28, 2020 3504
VIII Governu Konstitusional anterior. Foto dokumentasaun VIII Governu Konstitusional anterior. Foto dokumentasaun

DILI:Tuir planu, ohin, 29 Maiu 2020, Prezidente Repúblika Francisco Guterres Lú Olo, sei fó posse ba membru governu foun na’in walu (8).

Tuir komunikadu ne’ebé INDEPENDENTE Online asesu, Kinta horsehik (27/05), deklara, PR uza nia kompeténsia tuir artigu 106 númeru 2 K-RDTL hodi nomeia no ezonera membru Governu hafoin simu proposta husi Primeiru Ministru.

Tanba ne’e PR liu husi Dekretu Prezidente, númeru 39/2020, nomeia Vise Primeira Ministra Armanda Berta dos Santos (KHUNTO), Ministru ba Prezidénsia Konsellu Ministru Fidelis Manuel Leite Magalhāes (PLP), Ministru ba Assuntu Parlamentares no Komunikasaun Sosiál, Francisco Martins da Costa Perreira Jerónimo (FRETILIN), Ministru Finansas Fernando Hanjam (FRETILIN), Ministru Administrasaun Estatal Miguel Pereira de Carvalho (FRETILIN), Ministra Saúde Odete Maria Freitas Belo (FRETILIN), Ministru ba Assuntu Kombatentes Libertasaun Nasionál Júlio Sarmento da Costa ‘Meta Mali’ (PD), no Ministru Agrikultura no Peskas Pedro dos Reis (FRETILIN).

Serimónia tomada posse ne’e sei hala’o iha Palásiu Prezidensiál Nicolau Lobato, tuku 10:00 oras Timor-Leste.

PR Ezonera MG 3

Prezidente Repúblika Francisco Guterres Lú Olo, liu husi Dekretu Prezidente Repúblika númeru 36/2020, 37/2020 no 38/2020 ezonera membru Governu na’in tolu.

Membru governu ne’ebé hetan ezonerasaun mak Ministru Estadu Prezidénsia ba Konsellu Ministru Hermengildo Augusto Perreira, Ministru Reforma Lejislativa no Assuntu Parlamentar  Fidelis Magalhães, no Ministru Agrikultura no Peskas Joaquim Gusmão Martins.

 “Ministru Hermenegildo Augusto Perreira rezigna an husi nia kargu, halo tuir orientasaun husi Partidu CNRT,” esplika komunikadu ne’ebé INDEPENDENTE asesu.

Ba Ministériu Reforma Lejislativa no Assuntu Parlamentár, komunikadu ne’e dehan, halakon iha Lei Orgánika foun Governu daualu, tan ne’e Fidelis Magalhaes hetan fali nomeasaun foun husi PR ba kargu Ministru ba Prezidénsia Konsellu Ministru.

Rate this item
(0 votes)

Independente Digital TV