Xefe Delegasaun Timor-Leste atual Diretora Ezekutiva Gabinete Fronteira Maritimas Elizabeth Exposto hateten, durante loron rua TL ho Indonézia halo negosiasaun formal ba dahuluk kona-bá fronteira maritima no ekipa boot hosi Indonézia mai ho komitmentu ne'ebe diak atu resolve Fronteira Maritima tuir lei internasional no konvensaun nasoens unidas kona bá direitu tasi-nian.

“Primeira reuniaun formal hatudu komitmentu no kompromisu rai rua nian, nune’e tenta atu halo diskusaun rezolve prosesu tuir maneira pasifika lei direitu internasionál. Reuniaun primeiru ne’e loke dalan di'ak no iha komitmentu hosi Indonézia ho Timor-Leste. Diskusaun ne'e la’o ho ambiente espiritu kooperasaun no espiritu de amizade ," Xefe Delegasaun TL ba jornalista sira iha ótel Palm Spring Fatuhada, Kuarta (20/08).

Xefe Delegasaun TL Negosiasaun hatutan, iha reuniaun dahuluk ne’e Timor-Leste  mak realiza no sai hanesan uma-nain nune’e reuniaun tuir mai sei realiza iha Indonézia.

“Maibé, antes tinan ida ne’e remata, ita sei halo reuniaun ida tan depois kontinua reuniaun iha tinan oin,  tanba kompromisu iha tiha ona. Entaun ida ne’e hanesan negosiasaun formál dahuluk ne’ebé ita halo kona-ba fronteira marítima entre Indonézia ho Timor-Leste. Ida-ne'e foin hahú prosesu ida, hanesan ita hatene katak negosiasaun ba fronteira marítima sira maka prosesu ida ne'ebé kompleksu. Presiza duni tempu balun, maibé iha kompromisu hosi parte rua atu koko no atu rezolve prosesu ne’e, hodi rezolve negosiasaun sira ho dame no tuir lei internasionál no mós tuir Konvensaun Nasoens Unidas nian kona-ba Direitu Tasi nian,” nia esplika.

Haktuir tan katak, TL-Indonézia hetan ona orientasaun husi lei internasionál no UNCLOS no iha kompromisu sólidu husi parte rua atu kontinua resolve fronteira marítima sira ho maneira pasífika.